امریکانینگ جنوبی و مرکزی آسیا بویېچه مخصوص وکیلی سرجیو گور، اوشبو مملکت تشقی ایشلر وزیری مارکو روبیونینگ اۉزبېکستان سفر قېلیشینی معلوم قیلگن.
هندوستانده امریکا ایلچیخانهسینینگ اعلام قیلیشیچه، روبیو جاری میلادی ییل اکتوبر آیینینگ اۉرتهلریده امریکانینگ ۱۰۰ دن آرتیق کمپنیهلریدن عبارت تجاری بیر هیات باشچیلیگیده، اۉزبېکستاننینگ سمرقند شهریگه سفر قېلهدی.
مذکور سفردن مقصد امریکا و مرکزی آسیا اۉرتهسیدهگی استراتژیک شریکلیکنی مستحکملش همده دیپلماتیک و سودا همکارلیکنی کېنگهیتیریش دیېلگن.
اوشبو سفر جریانیده مارکو روبیو، قزاقستان، قرغیزستان، تاجیکستان، تورکمنستان و اۉزبېکستان تشقی ایشلر وزیرلری اشتراکیدهگی «C5+1» وزیرلر یېغیلیشیگه قتنهشهدی.
مذاکرهلرنینگ اساسی موضوعلری، منطقهای اقتصادی علاقهلرنی کېنگهیتیریش، انرژی خوفسیزلیگینی تامینلش و مرکزی آسیا مملکتلرینینگ قۉشمه اولویتلری بۉیېچه همکارلیک قیلیشدن عبارت دیر.
هندوستانده امریکا ایلچیخانهسینینگ بیاناتی اساسیده، روبیو اۉزبېکستان رهبرلری همده منطقه مملکتلر رسمیلری بیلن تورلی موضوعلر توغریسیده اوچرهشیشی ممکن.
