طالبان‌نینگ تخار ولایتیده‌گی استخبارات اداره‌سی‌نینگ خادملری بوندن چمه‌سی ایکّی هفته آلدین، اۉزبېک تیلی‌ده شعر یازیب ایجاد قیلیب کېلگن همده مکتب اۉقیتووچیسی مژده اۉزبېک و اونینگ اېرینی حبسگه آلگن.
مژده اۉزبېک بېش فرزند آنه‌سی همده تخار ولایتی خواجه‌غار اولسواللیگی‌نینگ سابق حکومت دوریده اېکینچیلیک مدیری، مامور شاه‌ولی خان ناملی شخص‌نینگ قیزی دیر.
بو اۉزبېک عیال‌نینگ تورموش اورتاغی ناصر آتلی شخص بۉلیب، ناصر هم سابق حکومت اوردو کوچلری صفیده خذمت قیلگن حربی دیر.
مژده اۉزبېک تخار ولایتی خواجه‌غار اولسواللیگیده‌گی «خواجه‌غار قیزلر لیسه‌سیده» مکتبنی بیتیرگن و حاضرده هزارباغ حدودی‌نینگ «گوهرشاد بېگیم» نامیده‌گی قیزلر لیسه‌سیده اۉقیتووچی اوله‌راق فعالیت قیلیب کېلماقده اېدی.
اۉزبېک تی‌وی بیلن بوحقده صحبت قیلگن برچه منبعلر، مژده اۉزبېک اۉزی‌نینگ شعرلری و جسارتلی بیر عیال بۉلگنی اوچون محل یشاوچیلری آره‌سیده تانیلگنینی اَیته‌دیلر.
اۉزبېک تی‌وی بو عیال شاعر نیمه اوچون حبسگه آلینگنی حقیده انیق معلوماتلرنی تاپیش اوچون کمیده تۉرت منبع بیلن گپیردی و اولرنینگ معلوماتیگه کۉره، طالبان مژده اۉزبېک و اونینگ اېرینی هیچ قنده‌ی بیر ایضاح بېرمه‌ی حبسگه آلگن.
شو سبب، حاضرگچه بو اۉزبېک عیال نیمه اوچون حبسگه آلینگنی بیللی اېمس و منبعلر او یازگن شعرلری همده طالبانگه قرشی سیمالر بیلن علاقه‌ده بۉلگنینی سبب دېب کۉرسه‌تماقده.
مژده اۉزبېک‌نینگ اېری ناصر اوچ کون آلدین، ضمانت بیلن آزاد اېتیله‌دی بیراق بو عیال‌نینگ اۉز تقدیری هلی بیللی اېمس.
