طالبان اېکینچیلیک، چاروهچیلیک و سووغاریش وزیرلیگی‌نینگ بوگون (۱۲-میزان، یکشنبه)، اۉز وبسایتی بیر بیانات آرقه‌لی یازیشیچه، تخار ده چاروهدار عیاللر اوچون لبنیات پروسس قیلیش ایکّی مرکز آچیله‌دی.
بیانات‌ده کیلیشیچه، تخار اېکینچیلیک ریاستی‌نینگ ترقیاتی دستورلری دوامیده بو ولایت نمک‌فروشی و جوی‌شیخ قیشلاقلریده سوت تولید قیله‌دېگن چاروهدار عیاللرگه لبنیات‌نی پروسس قیلیش ایکّی مرکز آچیلیشی مقصد ستندرد اوسکونه‌لر و جهازلر ترقه‌تیلیش جریانی باشلنگن.
ایتیلیشچه، مذکور ایکّی لایحه «میشن ایست» موسسه‌سی تامانیدن تخار اېکینچیلیک ریاستی‌نینگ چاروهچیلیک و اېکینچیلیک آمریتی هماهنگلیگی بیلن عمل‌گه آشیریله‌دی.
شونینگدېک اوشبو عیاللرگه بیر قطار اوسکونه ترقه‌تیلیب و بو توغریده اولرگه تعلیم هم بیریله‌دی. مذکور ایکّی مرکز‌ده‌گی عیاللرگه تورت آی تعلیم بیریلیب و بو دوره بیتگنی‌دن کیېن، مرکزلرنی مدیریت قیلیش، سوت‌نی ییغیش و پروسس قیلیش، محصوللرنی ساتیش و درآمد قولگه کیلتیریش ایشلری مستقل شکلده بو مرکزلرده‌گی فعال عیاللرگه تاپشیریله‌دی.
طالبان قیزلر یوزیگه مکتبلر و بیلیم یورتلر ایشیگی همده اولرنینگ بیر قطار ییرده ایشلشی‌نی تقیقله‌گنی بیرحالده، خاتین-قیزلرنینگ اېکینیچیلیک ایشلری بیلن شغللنیش گه تشویق قیلیب و کوپینچه پیت یاردم بیره‌دی.
