تهران عالی محکمه‌سی میلادی 2020- ییلده «سپاه پاسداران» نینگ قدس بولیمی باشلیغی جنرال قاسم سلیمانی نینگ اۉلدیریلگنی اوچون امریکا دولتی، امریکالیک رسمیلر و تشکیلاتلر 50 میلیارد دالر تاوان تۉله‌شی کېره‌کلیگی حقیده حکم بېردی.
ایران نینگ «ایرنا» رسمی اخبارات آژانسی نینگ گزارشی اساسیده، تهران نینگ خلق‌ارا علاقه‌لر بۉییچه فقرالیک محکمه‌سی 3 مینگ 318 شکایتچی نینگ عارضه‌سی بیلن آچیلگن ایش بۉییچه، امریکا دولت موسسه‌لری و بو دولت نینگ خصوصی و حقوقی شخصلرینی مالی ومعنوی ضرر تۉلش گه چقیرگن.
اوشبو قرارگه کۉره، امریکا حکومتی و اونگه علاوه امریکاده‌گی 42 حقیقی و حقوقی شخصلر 49 میلیارد 770 میلیون دالر تاوان پولی تۉلش گه محکوم بۉلگن. مذکور شخصلر آره‌سیده اۉشه پیتده‌گی امریکا جمهوررئیسی دونالد ترامپ و سابق دولت کاتبی مایک پومپیو، سوءقصد بویروغی بېرگنی اوچون شامل دیر.
جاری ییل 27- سپتامبر کونی ایران محکمه‌سی 73 امریکالیک شخص، جمله‌دن ترامپ گه نسبتن «قاسم سلیمانی و اونینگ اطرافیدگی‌لرگه قرشی ترورچیلیک حرکتلر صادر اېتیش، تروریزم نی ترغیب قیلیش و اساسی انسان حقوقلرینی بوزیش» ده عیبلاوی خلاصه‌سی تیارلنگنینی اعلان قیلگندی.
اَیتیش کېره‌ک که بوندن آلدین ایران تشقی ایشلر وزیری حسین امیر عبداللهیان، ایران امریکا گه قرشی جبهه آچماقچی اېکنلیگینی معلۉم قیلگندی.
