تخار ولایتی سرایسنگ اولوسواللیگی نینگ قزاق قیشلاغیده بیرینچی مرته آیخانم نامیده‌گی قالین تۉقیش کارگاه‌سی آچیلگن. اوشبو مرکزده چمه‌سی 40 کیشی خاتین- قیزلر قالین تۉقیش صنعتینی اۉرگنماقده‌لر.
تۉقوچیلرنینگ کۉپچیلیگینی عالی اۉقو یورتلردن فارغ بۉلگن قیزلر تشکیل بېره‌دی. آیخانم قالین تۉقیش کارگاه‌سی سرایسنگ یشاوچیلریدن بۉلگن حامد قرلق تمانیدن قوریلیب، اونینگ تورموش اۋرتاغی تمانیدن باشقریلماقده.
حامد قرلق نینگ ایتیشیچه آیخانم قالین تۉقیش کارگاه‌سینی قوریشدن مقصد جاری وضعیتده اویلریگه قمه‌لیب قالگن عیاللرگه ایش زمینه‌سینی یره‌تیش بۉلگن.
کیله‌جکده کییم- کېچک تیکیش و باشقه قۉل صنعتلرینی هم قۉشیشنی ریجه‌‌لشتیرگنلر. اما افغانستانده‌گی اقتصادي وضعیت افگارلیگی طفیلی قۉل صنعتلری بازاری ساووق بۉلگنی ایتیلماقده.
حامد قرلق نینگ ایتیشیچه آیخانم قالین تۉقیش کارگاه‌سی نینگ محصولاتی کۉپینچه‌لیک قندوز شهری و پایتخت کابلده اۉتکزیله‌یاتگن کۉرگزمه‌لرده نمایشگه قوییله‌دی.
باشقه تماندن محصولاتنی ساتیش بازاری ساووق بۉلسه هم اوشبو کارگاه موجود حاکمیت بویروغی اساسیده اۉقیش و ایشلشدن منع بۉلگن عیاللرنی مشغول اېتیش و اولرنی روحي کسللیکلردن قوتقزیش اوچون یخشی بیر فرصت بۉلگنی ایتیله‌دی.
آیخانم کارگاه‌سی اۉقوتوچیلری نینگ ایتیشیچه کونیده اۋنلرچه قیز ایش تاپیش اوچون مراجعت اېتیب اما جای تنقیصلیگی باعث رد اېتیلماقده‌لر.
شو یوزدن آیخانم قۉل صنعتلری کارگاه مسوللری کۉپچیلیک عیاللرگه ایش زمینه‌سینی یره‌تیش اوچون خلق ارا یاردم سېور جمغرمه‌لر تمانیدن حمایه اېتیلیشینی ایستەیدیلر.
معلوماتلرگه کۉره تخار ولایتیده تۋپلم 350 کیشی عیال مرکز و اولوسواللیکلرده قوریلگن 10 مرکزده ایش یوریتماقده‌لر.
