غزه‌ده اوروش دوام اېته‌یاتگنی و شونینگدېک حزب‌الله لبنان و اسراییل آره‌سیده تارتیشمه‌لر کۉپه‌یشی سبب، ایکّی یوقاری مرتبه‌لی امریکا رسمی‌سی «یقین شرققه» سفر قیله‌دی.
امریکا یوقاری مرتبه‌لی رسمیلری یقین شرققه سفر قیلگن بیرحالده، اسراییل و حماس آره‌سیده‌گی اوروش نی تۉخته‌تیش اوچون غرب و منطقه مملکتلری سعی و حرکت قیلیب کېلماقده، بیراق مذکور اوروش کېنگه‌یشی توغریسیده بۉلگن خوف کۉپه‌یماقده.
اۉتکن کون چهارشنبه بیر یوقاری مرتبه‌لی امریکا رسمی‌سی خبرچیلر بیلن اۉتکزگن صحبتیده ایتیشیچه، امریکا تشقی ایشلر وزیری آنتونی بلینکن پنج‌شنبه کېچه واشنگتن‌دن یقین شرق باره‌دی و او اوشبو سفر جریانیده، اسراییل باریشی هم ممکن.
گزارشلر اساسیده، جناب بلینکن غزه‌گه انسان‌دوستلیک یاردملر یوباریلیشی نی آسانلشتیریش توغریسیده‌گی سعی و حرکتلر و شونینگدېک غزه‌ده تینچ اهالی تلفاتی قویی کېلیشی حقیده خلق‌ارا باسیملر دوا اېتیب کېلگن بیرحالده، یقین شرققه باره‌دی.
شونده‌ی بیرحالده، ترکیه تشقی ایشلر وزیری هاکان فیدان نینگ بیاناتی گه کۉره، آنتونی بلینکن شنبه کونی اوشبو مملکت رسمیلری بیلن اوچره‌شیشی ممکن.
