ترکیه پایتختی انقره شهریده دوستم بنیادی و انقرەده‌گی افغانستان‌لیک تورک انجمن‌لری‌نینگ تشبثی بیلن ۱۴- جدی اوزبېک و تُرکمن تیل‌لری نینگ افغانستان‌ده رسمیت‌گه تانیلگن کونیدن نشانلندی.
اوشبو احتفال‌ده افغانستان ملی اسلامی جنبش حزبی‌نینگ یېریک اعضالری، مدنی همده سیاسی فعال‌لر، فرهنگی و ادبی سیمالر، یاش‌لر و عیال‌لر قتنشگن. مذکور احتفال اشتراکچی‌لری اۉزبېک تیلی‌نینگ اۉرنی و بو تیل‌نی رواجلنیشی اوچون بوندن ۲۰ ییل اېلگری اساسی قانون‌گه کیریتیلیشی اهمیتی خصوصیده نطق سۉزله‌شگن.
شونېنگ‌دیگ یېغین اشتراکچی‌لری، اۉزبېک تیل و ادبیاتی کۉپراق رواجلنیشی اوچون اۉنملی آدیم‌لر کۉتاریلیشی و بو خصوصده دقت اېتیلیشی اوستیگه اۉرغوله‌شگن.
بونگه قۉشیمچه، مذکور احتفال‌ده افغانستان اۉزبېک‌لریگه عاید تورلی خیل اۉزبېکانه آذیق-آوقت کۉرگزمه‌گه قوییلدی.
دیمک بوندن ۲۰ ییل آلدین افغانستان‌ده اۉزبېکچە و تُرکمنچە تیل‌لری عصرلر محرومیت‌گه سقلنیشی و حکومت‌لر تامانیدن بو تیل‌لر رواجلنیشی خصوصیده توجه قره‌تیلمس‌لیگیدن کېین، ایلک‌بار اهالیسی کۉپلب بو ایکی تیل‌گه سۉزلشووچی منطقه‌لرده اوچینچی رسمی تیل اۉله‌راق تَن آلینیب و بو تیل‌لر رواجلنیشی اوچون چاره-تدبیرلر کۉریلیشی بیلدیریلگن اېدی.
اۉتکن 20 ییل جریانیدە، اۉزبېک تیلی رواجلنیشی اوچون بیر قنچە سعی‌وحرکت اېتیلدی و بو حرکت‌لرنینگ کۉپینچه‌سی فرهنگی فعال‌لر تامانیدن بجریلگن و بو ییل‌لر جریانیدە بیر قطار یېتکرمە‌لر اۉزبېک تیلی‌گه یایین بیریش‌گه باشلب، یوزلرچه کتاب‌لر چاپ‌دن چېقدی.
بیراق افغانستان‌ده‌‌گی سۉنگی اۉزگریشلر اینیقسه جمهوریت تیزیمی‌نینگ قوللشی و افغانستان اۉزبېک‌لریگه قرشی مهرسیزلیکلر، اۉزبېک تیلی رواجلنیشی خصوصیده ایریم خواطرلر توغدیرگن.
