پاکستان اسلام عالم‌لری جمعیت حزبی، اوشبو حزب رهبری مولانا فضل الرحمن‌نینگ افغانستان‌ده‌گی آلتی کون‌لیک سفری جریانیده اۉتکزگن اوچره‌شوولری خصوصیده بیانات ترقه‌تیب، بو اوچره‌شوولرده طالبان‌نینگ بیر نېچه یوقاری مرتبه‌لی رسمی‌لری بیلن تورلی مسئله‌لر حقیده سۉزله‌شیلگنی‌نی بیلدیرگن.
مذکور حزب‌نینگ بو توغریده‌گی بیاناتی‌گه کیلیشیچه، طالبان ملی مدافعه وزیرلیگی‌نینگ سرپرستی یعقوب مجاهد، مولانا فضل‌الرحمن‌گه سیز بیلن بیزنینگ آره‌میزده هیچ قنده‌ی فرق یۉق دېب و بو سفرنی کابل و اسلام‌آباد اۉرته‌سیده‌گی تارتیشوولر حل اېتیلیشی اوچون اۉنملی دېگن.
شونینگدېک پاکستان اسلام عالم‌لری جمعیت حزبی، اوشبو حزب رهبری‌نینگ افغانستان‌گه قیلگن سفری‌دن مقصد، افغانستان و پاکستان آره‌سیده‌گی قیینچیلیک‌لرگه یېچیم یۉل تاپیش دېب، معلوم قیلگن.
بیراق پاکستان تشقی ایشلر وزیرلیگی‌نینگ سوزلاوچیسی زهرا ممتاز بلوچ، پنج‌شنبه کونی هفته‌لیک خبری ییغینیده، پاکستان‌‌لیک بو مذهبی همده سیاسی سیمانینگ افغانستان‌ده‌گی سفرینی شخصی بیر سفر دېب و بو سفر جریانیده بحث‌گه آلینگن موضوعلر و قرارلر پاکستان حکومتی‌گه تېگیشلی بۉلمه‌گنی‌نی بیلدیرگن.
