فاریاب ولایتی خواجه‌سبز پوش تومنی‌نینگ بایقیزی قیشلاغیده‌گی قتناویۉل چیککه‌سیده ییرلشگن بایقیزی قیزلر مکتبی بناسی اۉچ ییل آلدین طالبان و جمهوریت حربی کوچلری آره‌سیده‌گی آتیشمه‌لر جریانیده آلاو آلگن، بیراق حاضرگچه بو مکتب بناسی قیته قوریلمه‌گن.
بایقیزی قیشلاغی یشاوچیلریدن قطاری، اوشبو مکتب نینگ قیته قوریلیشی نی سوره‌ب ایتیش‌لریچه، مذکور مکتب قیته توزلمه‌گنی باعث قیز باله‌لر اوغیل باله‌لرنینگ مکتبی‌گه باریب، اَیری وقت‌لرده کوپ قیینچلیکلر بیلن درس اۉقیش‌گه مجبورلنگن.
بایقیزی یشاوچیلری بۉلمیش سیدحسن عالمی بو توغریده بوندی دیدی: “اۉتگن حکومت دوریده‌گی اوروشلر باعث بۉلدی که بو ییرده هاوان کیلیب توشدی و کیین حربی کوچلر بو ییرنی پوسته قرار بېردی‌لر، شو اوچون مکتب آلاو آلدی.”
بایقیزی قیشلاغی یشاوچی‌لردن داکتر هدایت‌الله اۉزبېک تی‌وی بیلن اۉتکزگن صحبتیده ایتیشیچه، قیز باله‌لر کۉپ یول یوریب اوغیل باله‌لر مکتبی‌گه باریب درس اۉقیدیلر که عمومی سرک‌دن اوتیش باله‌لرگه قیین و بعضن ترافیکی حادثه‌لر بیلن دوچ کیلیش‌لری ممکن. “بو ییر قریه بایقیزی و قیزلر مکتبی دیر و افسوس مکتب بناسی خراب بۉلگن و اۉچ ییل‌دن بیری بو مکتب قیز اوقووچیلری قیینچیلیککه قالگن، حاضر قیزلر تاغ‌نی تگیده اوغیل مکتیده باریب کیله‌دی و عمومی سرک‌دن اوتیش باعث ایریم پیت‌لر ترافیکی حادثه‌لر هم یوز بېریشی ممکن.”
بایقیزی قیشلاغی یشاوچیلریدن باشقه بیری نورمحمدنینگ ایتیشیچه، باشقه ولایت و اولوسواللیکلرده اوروشلر جریانیده آلاو آلگن مکتبلر قیته توزلگن، بیراق بو مکتب‌نینگ قیته قوریلیشی اوچون حاضرگچه هیچ قندی توجه بۉلمه‌گن.
نورمحمدنینگ کوپه‌یتیریشیچه:”مین شو مکتب یانیده یشه‌یمن، حکومت‌دن بو مکتب اوچون توجه قره‌تیلیشینی خواهله‌یمن، مین فیسبوک‌لردن کوردیم باشقه ییرلرده مکتب قوریله دی و توزاله‌دی بیلمه‌دیم نیمه اوچون بو مکتب بناسی قیته قوریلمه‌یدی، بیز بیرنیچه بار بو خصوصده معارف ریاستیده تکلیف هم بېردیک، بیزنی باله‌لریمیز کوپ قیینچیلیککه دوچ دیر.”
بایقیزی قیزلر مکتبی جمهوریت حکومتی دوریده معیاری بیر شکلده قوریلیب و یوزلرچه قیز بو مکتب‌ده درس اۉقیب کېلماقده اېدیلر، بیراق بو مکتب بناسی اېسه اوچ ییل آلدین اوروشلر جریانیده آلاوگه یانیب بوزیلگن و حاضر گچه اونینگ قیته قۉریلیشی اوچون هیچ قنده‌ی اَدیم کوتاریلمه‌گن.
