بیرلشکن ملتلر تشکلاتی نینگ افغانستان‌ده‌گی نماینده‌لیگی یاده یوناما، اۉزینی اۉچ آی‌لیک تیکشیرووی خصوصیده، بیر گزارش ترقه‌تیب تفصیلات بېردی.
یوناما نینگ اوشبو گزارشی میلادی ۲۰۲۴ – ییل دستلبکی اۉچ آیی‌نی شامل بۉلیب، اۉنگه افغانستان‌ده انسان حقلری و عیاللر وضعیتی، سۉز ایرکین‌لیگی، پارتلش‌لر و حربی قرمهقرشیلیکلر، سابق حکومت اعضالری ناقانونی توتقین‌گه آلینشی و عامه حضوریده طالبان تامانیدن جزالنیش و اعدام اېتیلیش جریانی دوامی خصوصیده معلومات بېریلگن.
انسان حقلری وضعیتی و سۉز ایرکین‌لیگی:
یوناما اوشبو گزارشیده طالبان نینگ عیاللرگه قرشی چیکلاولری دوامیدن خبر بېریب، یازیشیچه، اوشبو مدت جریانیده، افغانستان‌ده تعلیم ییلی قیزلر حضورسیزلیگیده باشلندی و طالبان حکومتی تعلیم ییلی باشلنیشی مناسبتی بیلن اوتکزگن ییغینیده عیال ژورنالیست‌لر حضورینی هم تقیق‌لگن اېدی.
بونگه قوشیمچه، یوناما اوشبو اۉچ آی جریانیده افغانستان‌ده اۉچ ژورنالیست طالبان تامانیدن حبس‌گه آلینیب، آزاد اېتیلیشی رویخط‌گه آلینگن و یوناما طالبان تامانیدن یېتکرمه‌لرگه قرشی بۉلگن چیکلاولر دوامیدن خبر بېرگن.
یوناما همده، طالبان تامانیدن قندهار ولایتیده ییغین‌لر صورت‌گه آلینمسلیگی هم سۉز ایرکین‌لیگیگه قرشی بیر آدیم اېدی دېب، معلوم قېلگن.
پارتلش و حربی قرمهقرشیلیکلر:
بیرلشکن ملتلر تشکیلاتی نینگ افغانستان‌ده‌گی نماینده‌لیگی گزارشی اساسیده، میلادی جاری ییل نینگ دستلبکی بیرینچی اۉچ آیی جریانیده، افغانستان‌ده کمیده تۉرت پارتلش هجوم اویوشتیریلگن.
اوشبو هجوم‌لرنی بیرینچی‌سی، جنوری آیی نینگ آلتینچی کونی کابل غربیده صادر بۉلیب، بو واقعه عاقبتیده، بیش کیشی اۉلیب و ینه ۲۰ کیشی یره‌لنگنی معلوم قیلینگن.
بو ییل‌ده‌‌گی ایکینچی پارتلشی هجومی، جنوری آیی نینگ ۹ – کونی کابل‌ده طالبان نینگ قماقخانه‌لر اداره‌سی ایشلاوچیلرینی تاشووچی موترنی مقصدگه تۉتگن و بو واقعه عاقبتیده، اۉچ کیشی اۉلیب ینه ۱۳ کیشی یره‌لنگن.
شونینگدېک، جنوری آیی نینگ ۱۱ – کونی کابل غربیده واقع سوداگرلیک بیر مرکزده پارتلش یوز بېریب، اۉچ کیشی اۉلیب ینه ۳۵ کیشی یره‌لنگنی بیلدیریلگن.
و نهایت یوناما تامانیدن رویخط‌گه آلینگن تۉرتینچی پارتلش هجوم هم، ۲۱ -مارچ کونی کندهار ولایتیده کابل بانک اداره‌سی اونگیده یوز بېرگن که بو هجوم عاقبتیده ۲۵ کیشی اۉلیب و کمیده ۵۰ کیشی یره‌لنگن.
اوشبو تۉرت پارتلش هجوم جمله‌سیدن اۉچ هجوم نی داعش گروهی بوینیگه آلگن و بیرته هجوم کیم تامانیدن اویوشتیریلگنی حاضرگه قدر معلوم بۉلینگن اېمس.
شونینگدېک، یوناما اۉزینی گزارشیده، پاکستان نی خوست و پکتیا ولایتلریده بۉلگن هوایی هجوملری عاقبتیده ۸ کیشی جان بېریب، ینه ایکی کیشی یره‌لنگنی معلوم قیلینگن.
سابق حکومت اعضالری توتقین‌گه آلینیشی:
یوناما اۉزینی گزارشیده معلوم قیلیشیچه، طالبان نینگ عمومی کیچیریم قراریگه قرشی، افغانستان سابق حکومت اعضالری توتقین‌گه آلینیشی دوام اېتکن.
یوناما تامانیدن رویخط‌گه آلینگن معلومات‌لرگه اساس، طالبان اۉتگن اۉچ آی جریانیده کمیده ۳۸ کیشی‌نی ناقانونی توتقین‌گه آلگن که بو جمله‌دن اۉن کیشی‌گه قرشی یامان یانده‌شوو بۉلیب اولر طالبان تامانیدن کلتک‌لنگن.
عامه حضورریده جزالنیش:
یوناما نینگ آرتیق‌لشیچه، طالبان اۉتگن فبروری آیی جریانیده غزنی و جوزجان ولایتلریده اۉچ کیشی‌نی عامه حضوریده اعدام قیلگن و شونینگدیک هر هفته طالبان بیر ولایتده متهم‌لرنی عامه حضوریده جزاله‌یدی.
