اوروش و ناتینچ‌لیکلرنینگ افغانستان خلقی اوستیده آلیب کېلگن یامان تقدیرلریدن بیری، اولرنی بدرغه‌لیکلرگه جبرلنتیریشی دیر.
اندخوی‌لیک «مبین حکیمی»، افغانستان نینگ میلیون‌لرچه یاش-ییگیتی‌دن بیری دیر که مملکتده اوروش عاقبتیده اۉرته‌گه کېلگن آغیر و اچینرلی احوال، اونی غربت یۉلینی توتیش‌گه جبرلنتیرگن.
مبین حکیمی بیراق باشقه کۉپینچه‌لردن فرق‌لی، اونی بدرغه‌لیککه تارتگن آغیر احوال و غربت یۉلی‌ده کۉرگن شرایط‌لرینی قلم بیلن بیان قیلیش‌گه اولگوریب، «مهاجرت» نامی آستیده بیر کتاب یازگن.
یقین‌ده ایران اولکهسیده چاپ‌دن چیققن بو کتاب، یازووچی «مبین حکیمی» قندی بۉلیب مهاجرت‌گه یۉل توتگنی همده اندخوی و افغانستان‌ده‌گی اوروش‌لرنینگ یامان عاقبت‌لری حقیده حکایه قیلگن.
حاضر جرمنی مملکتی نینگ هامبورگ شهریده یشاوچی و بو شهرده ژورنالیست‌لیک ایشلری بیلن شغللنیب تورگن مبین حکیمی، اۉزبېک تی‌وی بیلن شریک قیلگن معلوماتیده، اوشبو کتاب حقیده ایتیشیچه “بو کتاب ایکی بولیمدن عبارت بۉلیب؛ مینی حکایه‌لریم همده مهاجرت قیلگنیم سبب‌لرینی بیان قیله‌دی. بیرینچی بولیم اندخوی‌ده بۉلگن اوروش لردن باشلنیب، کابل سفر قیلگنیم. شونینگدېک افغانستان نینگ طالبان حاکمیتی‌ده اۉرته‌گه کېلگن شرایطلری حقیده گزارش بېریلیب و تحلیلی مساله‌لر بیان اېتیلگن.”
ایتیش کېره‌ک که افغانستان میلیون‌لرچه وطنداشی اخیرگی تۉرت ییل ایچیده، خوفسیزلیک و ناتینچ‌لیکلر باعث افغانستان‌نی ترک اېتگن بۉلسه‌ده، ینه کۉپینچه‌لر اېسه اوشبو وضعیت باعث اۉرته‌گه کېلگن ایش‌سیزلیکلر کبی اقتصادی ناتینچ‌لیکلر سبب‌لی آنه یۉرتی‌دن بدرغه بۉلیش‌گه جبرلنگن.
دېیرلی مهاجرت افغانستان اوچون کۉپ ییللیک بیر معما دیر و یقین یریم عصردن بویان، مملکت گواه بۉلیب کېله‌یاتکن اوروش و تۉقنه‌شوولر، دایما بو مملکت اهالیسی نینگ مهاجرت‌گه جبرلنتیرگن.
