بیرلشکن ملتلر تشکیلاتی نینگ باش کاتبی آنتونیو گوتریش تامانیدن، افغانستان احوالی حقیده تیارلنگن ینگی گزارش نشر اېتیلدی.
گوتریش تامانیدن بیرلشکن ملتلر تشکیلاتی خوفسیزلیک کېنگشیگه ترقهتیلگن اوشبو گزارش، اخیرگی اوچ آی دوامیدهگی، افغانستان وضعیتی تۉغریسیده قرهتیلگن.
بیرلشکن ملتلر تشکیلاتی نینگ باش کاتبی بو گزارشیده، افغانستانده طالبان اۉز اقتداری اوچون کۉپراق سعیوحرکت قیلگنی و شونینگدېک انسان حقلری و خوفسیزلیک وضعیتلری تۉغریسیده معلومات بېریلگن.
طالبان حکومتدارلیگی
بیرلشکن ملتلر تشکیلاتی باش کاتبی اۉزی نینگ اخیرگی گزارشیده، طالبان رهبری هیبت الله آخندزاده، اۉز حاکمیتنی مستحکملشی خصوصیده کۉپراق اینتیلگنینی بیلدیرگن.
بو گزارشنی بیلدیریشیچه، طالبان رهبری اۉز اقتداری اوچون بیر قنچه ییغیلیشلر اۉتکزیب و اۉزیگه یقین انسانلرنی دولتی لوازملرده تعیین قیلگن.
اوشبو گزارش اساسیده، طالبان رهبری اخیرگی اوچ آی دوامیده، بیر وزیر، ایکی وزیرلیک اۉرین باسری و آلتی وزیرلیکده رسمیلر تانیشتیرگن و شونینگدېک بو مدت ایچیده طالبان تامانیدن اوچ ولایت والیسی، آلتی والی اۉرین باسری، ۱۸ محلی مقام و کمیده ۱۲ اولسوالنی اوزگرتیریلیب و بو لوازملرده طالبان رهبری، اۉزیگه یقین شخصلرنی تعیین قیلگن.
شونینگدېک بیرلشکن ملتلر تشکیلاتی نینگ باش کاتبی، طالبان رهبری اۉز قدرتنی مستحکملش اوچون قورال ترقهتیش و جواز بېریش صلاحیتنی هم وزیرلیکلردن آلگنینی بیلدیرگن.
انسان حقلری احوالی
بیرلشکن ملتلر تشکیلاتی نینگ باش کاتبی اخیرگی اوچ آی ایچیده، افغانستانده انسان حقلری احوالی آغیرلشگنیدن خواطر بیلدیرگن.
آنتونیو گوتریش اۉزی نینگ گزارشیده، اوشبو مدت ایچیده طالبان امر بالمعروف و نهی عن المنکر قانوننی جدیراق عملگه آشیریشگه اولگوریب، خاتین-قیزلر برابریدهگی چیکلاولرنی جدیلشتیرگنینی بیلدیرگن.
شونینگدېک طالبان اقتصاد وزیرلیگی ینه بیربار بویروغ ترقهتیب، ادارهلرده عیال ایشچیلر ایشگه آلینمسلیگینی تاکید قیلگنینی اعلام قیلگن، بیرلشکن ملتلر تشکیلاتی نینگ باش کاتبی ینگی گزارشیده.
خوفسیزلیک وضعیتی
بیرلشکن ملتلر تشکیلاتی میلادی ۲۰۲۴ – ییلی ۱ – نوامبر کونیدن میلادی ۲۰۲۵ – ییلی بیرینچی جنوریگه قدر ۲۰۸۱ ناتینچلیک واقعه افغانستانده یوز بېرگنینی رویخطگه آلگن.
بیرلشکن ملتلر تشکیلاتی گزارشیده، افغانستانده اوشبو واقعهلر رقمی اوندن بیر ییل ایلگریگه نسبتن، ۱۶.۸ فایز آزهیگنینی اعلام قیلدی.
عینی حالده، بیرلشکن ملتلر تشکیلاتی اخیرگی بیر ییل ایچیده افغانستانده اوغیرلیک واقعهلری، ۱۲۹ فایز کۉپهیگنینی بیلدیرگن.
بیرلشکن ملتلر تشکیلاتی نینگ باش کاتبی اۉزی نینگ گزارشیده، طالبانگه قرشی قورالی ناتینچلیک واقعهلر کۉپینچه داعش، ملی مقاومت جبههسی و آزادلیک جبههسی تامانیدن اۉیوشتیریلگنینی بیلدیریب، بو گروهلرنی هیچ بیریسی طالبان حاکمیتی برابریده جدی توسیقلیک یرهتمهگنینی بیان قیلگن.
