برازیل نینگ ریودوژانیرو شهری بوگون یکشنبه «بریکس اقتصادی تشکیلاتی» رهبرلری نینگ نوبتده‌گی ییغینی‌دن میزبان‌لیک قیلماقده دیر.
دنیا مالی تیزیمی‌ده اوزگریش یره‌تیش و خلق‌ارا سودالرده امریکا دالری کوچینی آزه‌یتیریش مقصدیده ایجاد اېتیلگن بو تشکیلات رهبرلری، بو ییل امریکاده دونالد ترامپ حکومت‌گه قیتگنیدن بیری سوداگرلیک ساحه‌سیده‌گی تارتیشوولر جدی‌لشگن بیرحالده اوچره‌شماقده.
برازیل‌ده اۉتکزیلیشی ریجه‌لشتیریلگن بریکس اقتصادی تشکیلاتی نینگ ییغینی‌ده، ایریم سیمالر جمله‌دن بو تشکیلات نینگ اساسی اعضالریدن بۉلمیش چین و روسیه دولت رهبرلری غایب‌لیگی، ایریم گمان‌لرنی اۉرته‌گه آلیب کېلگن.
چین جمهور باشلیغی شی‌جین پینگ، چین‌ده حاکم بۉلگنیدن بیری ایلک‌بار بریکس ییغینی‌ده اشتراک قیلمه‌یبتی و اۉرنیده باش وزیرینی جونه‌تگن.
حاضرگه قدر چین جمهور باشلیغی نیمه سبب بو ییغین‌ده اشتراک قیلمه‌گنی هم بیللی اېمس.
باشقه بیرتاماندن، بریکس تشکیلاتی نینگ ینه بیر اساسی اعضالریدن روسیه جمهور باشلیغی ولادیمیر پوتین هم بو تشکیلات ییغینی‌ده، یالغیز ویدیو آرقه‌لی اشتراک اېتیش‌گه اکتفا قیلگن.
بونگه قوشیمچه بریکس تشکیلاتی نینگ ینگی اعضاسی بۉلمیش ایران اسلامی جمهوریتی نینگ جمهور باشلیغی مسعود پزشکیان هم بو ییغین‌ده اشتراک قیلگن اېمس و اۉرنیده تشقی ایشلر وزیری سیدعباس عراقچی بارگن.
بریکس تشکیلاتی نینگ بو ییغینی شوندی بیرحالده دیر که بو تشکیلات اعضالری نینگ طلبی‌گه اساس، امریکا دالری نینگ دنیاده‌گی نرخی سونگی کونلرده بیراز آزهیگن.
