بیرلشگن ملتلر تشکیلاتینینگ افغانستان انسان حقلری بۉییچه مخصوص گزارشگری ریچارد بنت، افغانستان عیاللری اوچون تشکیل اېتیلگن ” خلق محکمهسی” نی آلقیشلهدی.
بنت اۉزی نینگ ایکس/سابق تویتر صحیفهسیده بو حقده شوندی دېب یازدی “مېن افغانستان خلقی تامانیدن تشکیل اېتیلگن و مملکت اهالیسی اوچون جوابگرلیکنی ایلگری سوریشگه قرهتیلگن اوشبو مهم خلق محکمهسینی آلقیشلیمن.“
اونینگ تاکیدلشیچه، بو محکمه قربانلر و آمان قالگنلرنینگ گواهلیکلریگه اساسلنهدی.
بنت بوندن ایلگری، افغانستانده خاتین- قیزلرگه نسبتن جدی چېکلاولر، جملهدن، تعلیم و ایشلش حقلری آلینیشی کبی خاتین-قیزلر برابریدهگی تۉسیقلر، شونینگدېک، جماعت حیاتیدن یۉق اېتیلیش حالتلرینی تنقید قیلگن اېدی.
او شونینگدیک خلق ارا همجمعیتنی، افغانستاندهگی انسان حقلری احوالیگه اعتبار قرهتیشگه چقیریب، خاتین- قیزلرگه نسبتن صادر اېتیلهیاتگن جنسی تعقیبلرنی انسانیتگه قرشی جنایت دېب بهالگن.
بنتنینگ فکریچه، عیاللر حقلرینی حمایه قیلیش و اولرنینگ جماعت حیاتیدهگی اشتراکی اوچون ایشانچ قۉلگه کېلتیریش، افغانستانده برقرارلیک و انسان حقلری نظرگه توتیلیشی اوچون مهم دیر.
ایتیش کېرهک که افغانستان سابق انسان حقلری کمیسیونی باشلیغی شهرزاد اکبر، اۉتگن کون افغانستان عیاللری اوچون «خلق محکمهسی» اۉز ایشیگه باشلهگنیدن خبر بېرگن اېدی.
ایتیلیشیچه بو محکمه، طالبان نینگ افغانستانده خاتین-قیزلرگه نسبتن باسیملر و چیکلاولریگه قرشی عدالت ایزلش مقصدیده فعالیتگه باشلهگن.
