امریکا قوشمه ایالتلری نینگ جمهور باشلیغی دونالد ترامپ، دوشنبه کونی ۱۸ – آگست محلی وقت بیلن ساعت ۴:۰۰ آقشم اوکراین جمهور باشلیغی ولادیمیر زیلنیسکی و اروپا اتفاقی مملکتلری نینگ رهبرلریدن میزبان‌لیک قیلدی.
امریکا جمهورلیک ریاست سرایی یا ده «آقسرای»ده اۉتکزیلگن بو ییغین‌ده، فرانسه، آلمان و فنلاند دولت رهبرلری اشتراک قیلیب، اوکراین اوروشی تقدیری خصوصیده فکر المشتیریلدی.
دېیرلی بو ییغین، ترامپ نینگ روسیه جمهور باشلیغی ولادیمیر پوتین بیلن بۉلگن اوچره‌شووی‌دن کېین اۉتکزیلماقده و اوکراین اوروشی‌گه عاید قوییده‌گی موضوع‌لر بحث اېتیلگنی اعلام قیلینگن.
اوکراین‌گه خوفسیزلیک کفالت
اوکراین جمهور باشلیغی ولادیمیر زیلنیسکی بو ییغین‌ده، بو مملکتده تینچ‌لیک تامین‌لنیشی اوچون خوفسیزلیک کفالت بېریلیشینی سۉره‌گن.
ولادیمیر زیلنیسکی مذکور کفالت بېریلگن تقدیرده، اوکراین امریکادن ۱۰۰ میلیارد دالر ارزشی‌گه قورال ساتیب آلیش‌گه وعده بپرگن و اروپا اتفاقی رهبرلری بو پول توله‌نیشینی نظارت قیلیش‌گه تیارلیکلرینی اعلام قیلگن.
عینی حالده امریکا جمهور باشلیغی، اوکراین خوفسیزلیک کفالت بېریش خصوصیده کېلیشووگه قۉل تاپیش‌لرینی بیلدیریب، امریکا تینچ‌لیک بیر کېلیشوو دایره‌سیده اوکراین‌گه یاردم بېریشینی معلوم قیلدی.
اوچ تامانلمه اوچره‌شوو
امریکا، روسیه و اوکراین دولت رهبرلری اۉرته‌سیده اۉتکزیلیشی کېره‌ک بۉلگن اوچره‌شوو، ترامپ، زیلنیسکی و اروپا اتفاقی رهبرلری آره‌سیده بۉلیب اۉتگن بحث‌لردن ینه بیری اېدی.
امریکا جمهور باشلیغی اوکراین‌ده تینچ‌لیک تامین‌لنیشی اوچون مذکور اوچره‌شوو اۉتکزیلیشی مهم دېب اورغوله‌گن و بو اوچره‌شوو بۉلیب اۉتیشی‌دن وعده بېردی.
آلمان باش وزیری نینگ ییغین‌دن کېین بۉلگن صحبت‌لری‌گه کۉره، مذکور اوچره‌شوو کېله‌سی ایکی هفته ایچیده اۉتکزیلیشی ممکن دیر.
عینی حالده، آق‌سرای‌ده اۉتکزیلگن ییغین‌ده حضوری بۉلگن اروپا رهبرلری اوچ تامانلمه اوچره‌شووده، پوتین اشتراک اېتیشی‌گه شبهه بیلن قره‌گن.
ایتیش کېره‌ک که حاضرگچه پوتین بو خصوصده تیارگرلیک کۉرسه‌تگن اېمس.
اوکراین نینگ ناتوگه اعضالیگی
بو اوچره‌شووده، روسیه‌گه حدودی امتیاز بېریلیشی همده اوکراین نینگ ناتو خوفسیزلیک تشکیلاتی‌گه اعضالیگی مساله‌سی خصوصیده انیق نیمه بحث‌لر بۉلگنی بیللی اېمس.
دیمک بوندن ایلگری امریکا جمهور باشلیغی بو خصوصده بیانات بېرگن اېدی. ترامپ‌گه کۉره، اوکراین‌ده تینچ‌لیک تامین‌لنیشی اوچون اوکراین ناتو اعضاسی بۉلمس‌لیگی کېره‌ک دیر.
