محمود مجروح
نظرمحمدخان‌نینگ اۉغلی محمود مجروح، ۱۳۲۹–ییلده میمنه شهری نینگ هِمت آباد گذریده توغیلگن. باشلنغیچ مکتب‌نی ابوعبید جوزجانی اۉرته مکتبیده، لیسه‌نی هم اۉشه یېرده توگتگن. آته‌سی دولت ماموری بۉلگن.
۱۳۴۵-۱۳۵۲ – ییللرده ملي «کانکور» امتحانینی تاپشیریب، کابل بیلیم یورتیگه اۉقیشگه کیرگن. اۉقیش دوریده کابل‌ده ترافیک حادثه‌سیگه اوچره‌ب، آیاغیدن آغیر جراحت آلگن. شو واقعه‌دن کېین او اۉزیگه «مجروح» تخلصینی تنله‌گن. اۉقیشنی توگتگچ، میمنه‌گه قَیتیب، دولت اداره‌لریده رسمي ایش باشله‌گن. او فاریاب‌ده، خصوصاً ابوعبید جوزجاني لیسه‌سی هنری گروهی نینگ ایلک قۉشیقچی و سازنده‌لریدن بیری بۉلگن.
اۉقووچیلیک ییللریده چیرایلی آوازی و شیره‌لی آهنگی اوچون اونی جمعیتده «لیسه بلبلی» دېب اتشردی. او هارمونیه چه‌لیب، قۉشیق کویلردی و مرحوم احمد ظاهرنینگ قۉشیقلرینی قَیته اجرا اېتیب شهرت قازانگن. اونینگ صنعت میدانیده‌گی فعالیتی فاریاب‌ده ۱۳۵۹-ییلدن باشلنگن. شو ییللرده او رسمي و شخصي ییغینلرده، کۉپینچه دو طبله و هارمونیه‌‌ده آواز کویله‌گن.
اینیقسه، شهر حاکمیتی پارکی و پروفیسور غلام محمد میمنه‌گي سینمای ستیژیده اۉتکزیلگن کۉپلب رسمي تدبیرلرده، سعیدجان هراتي (سعید عارف آغا گیلاني اۉغلی) اونگه دو طبله اجرا قیلگن. مجروح احمد ظاهرنینگ قۉشیقلرینی اۉزیگه خاص شجاعت و احتراس بیلن اجرا اېتگن. کېینراق او مز‌ار شریف شهریگه باریب، هنری فعالیتینی او یېرده دوام اېتتیرگن.
۶۰-ییللر نینگ اۉرته‌لریده خانیم نوريه سخي بیلن بیرگه‌لیکده آهنگلر کویلب، یاشلر آره‌سیده جوده مشهور بۉلیب کېتگن. شو دورده او عربخانه اۉرته مکتبی معلمه‌سی بۉلگن خانیم شهلا سوراش آصفی بیلن تورموش قورگن. اما، فاریاب‌ده‌گی کۉپچیلیک قۉشیقچیلر کبی، دولت حزبی رهبرلری نینگ قۉللب-قوّتله‌مسلیگی، مالیوي قیینچیلیکلر و اجتماعي معمالر سببلی، او هم اۉز صنعتینی کېنگ یاییب، افغانستان رادیو و تلویزیونیده قۉشیقلر یازیب، کتّه مشهورلیککه اېریشه آلمه‌دی.
سۉنگی بیر نېچه اۉن ییللیکده اېسه او و اونینگ هنری فعالیتی حقیده دېیرلی معلومات یۉق.
یازوچی: کاظم امنینی
ترجمان: حسن تۉلقین
