طالبان و پاکستان یوقاری مرتبه‌لی وکیللری، قطرنینگ دوحه شهری‌ده بو مملکت همده تورکیه واسطه‌چیلیگیده مذاکره اۉتکزیب، آتیش-کېسین برقرار اېتیلیشی و دایمی تینچ‌لیک میکانیزمی خصوصیده کېلیشیب آلگنلری خبر قیلیندی.
قطر تشقی ایشلر وزیرلیگی بو حقده نشر قیلگن بیاناتیده، اوشبو کېلیشوو اۉتگن کون شنبه ۲۶ – میزان اۉتکزیلگن مذاکره دایره‌سیده قۉلگه کېلگنینی معلوم قیلگن. شونینگدېک طالبان سۉزلاوچیسی ذبیح الله مجاهد هم بوگون اېرته‌لب (یکشنبه ۲۷ – میزان) بیر بیانات نشر قیلیب، بو کېلیشوو خصوصیده خبر بېرگن.
مجاهد کېلیشووده، ایکی تامان اۉرته‌سیده‌گی قرمه-قرشیلیکلر سۉزلشوو آرقه‌لی حل اېتیلیشینی بیلدیرگن.
اوشبو مذاکره‌ده تورکیه استخبارات اداره‌سی‌نینگ باشلیغی ابراهیم کالین و قطر تشقی ایشلر وزیری عبدالرحمن بن آل ثانی هم حضوری بار اېکن.
مذاکره‌ده قۉلگه کېلگن کېلیشوو اینقسه پاکستان و طالبان اۉرته‌سیده‌گی اساسی جنجللرگه قنده‌ی ییچیم-یۉل نظرده توتیلگنی حقیده آرتیقچه تفصیلات بېریلگن اېمس.
دیمک طالبان تامانیدن بو مذاکره‌ده، بو حاکمیت‌نینگ مدافعه وزیری محمدیعقوب مجاهد و پاکستان تامانیدن اېسه بو مملکت مدافعه وزیری خواجه محمدآصف اشتراک قیلگن.
تامانلر کېله‌سی کونلر هم آتیش-کېسین عملگه آشیریلیشی‌دن ایشانچ قۉلگه کېلتیریش مقصدیده ییغین‌لرینی دوام بېریشگه موافقت قیلگن.
ایتیش کېره‌ک که بو مذاکره، طالبان و پاکستان اۉرته‌سیده یوزلب کیشی اۉلیب و یره‌لنیشیگه سبب بۉلگن کینگ تۉقنه‌شوولردن کېین اۉتکزیلماقده دیر.
