کردستان ایشچیلر حزبی (ک‌ی‌پ) قورالسیزلنیش جریانی دایره‌سیده تورکيه‌دن چیقیب کېته‌یاتگنینی اعلان قیلدی. می آییده گروه اۉزینی اۉزی ترقه‌تیب یوباریب، تورکيه بیلن قوراللی کوره‌شنی توخته‌تیشینی بیلدیرگندی. ک‌ی‌پ، اۉز نوبتیده انقره‌نی، گروه‌نینگ سیاستیگه کیریشی‌گه امکان بېرووچی قدملرنی تشلشگه اونده‌یپتی.
رویترز یېتکیرمه‌سی: “کردستان ایشچیلر حزبی (ک‌ی‌پ) گروهی قورالسیزلنیش جریانی دایره‌سیده تورکيه‌دن چیقیب کېته‌یاتگنینی ایتیب، انقره‌نی، گروه‌نینگ سیاستیگه کیریشی‌گه امکان بېرووچی قدملرنی عملگه آشیریشگه اونده‌دی” دېب، یازماقده.
۱۹۸۴ ییلدن بېری تورکيه‌گه قرشی قۉزغلان کۉتریب کېله‌یاتگن ک‌ی‌پ، می آییده قماقده‌گی رهبری عبدالله اوجلان تامانیدن قوراللی کوره‌شنی تۉخته‌تیش حقیده‌گی چقیریقدن سۉنگ قورالسیزلنتیریش و ترقه‌لیب یوباریش‌گه قرار قیلگندی. جنگلر عاقبتیده ۴۰ مینگدن آرتیق کیشی هلاک بۉلگن.
تورکيه، امریکا قوشمه ایالتلر و اروپا اتحادیه‌سی تامانیدن ترورچیلیک تشکیلاتی دېب آتلنگن گروه جولای آییده رمزی حرکت صفتیده بعضی قوراللرنی یاقیب یوبارگن.
گروه نینگ ته‌ینچ نقطه‌سی، عراق شمالیده بۉلگن قندیل تاغلریده اۉتگن تدبیرده اۉقیلگن بیاناتده ک‌ی‌پ «اېرکین، دېموکرا‌تیک و برادرانه حیات» اساسلرینی یره‌تیش اوچون تورکيه‌دن برچه جنگریلرینی آلیب چیقیب کېتیش‌گه قرار قیلگن ایتیلگن.
اوشه بیاناتده ایتیلگنیچه، بو قدم گروه‌نینگ قورالسیزلنیش و انتیگراسیون جریانیگه صادقلیگینی عکس اېتتیره‌دی و تورکيه حکومتی اېندی انتیگراسیون قانونلرینی قبول قیلیش آرقه‌لی ک‌ی‌پ نینگ «دېموکرا‌تیک سیاستی»گه اۉتیشی اوچون یۉل آچیشی کېره‌کلیگینی قۉشیمچه قیلگن. جمله‌دن، «تورکيه سیاسي اۉزگریشلرنی عملگه آشیریشی و لایحه‌نی رۉیاگه چیقریش اوچون مناسب محیطنی حاضرلشی کېره‌ک».
تورکیه‌نینگ علاقه‌لر بوییچه وزیری برهان الدین دوران مملکتدن چیقیش حقیده‌گی اعلامیه‌نی آلقیشله‌دی و حکومت مستحکم تینچلیک و خوفسیزلیککه اېریشیشنی خواهله‌یاتگنینی ایتدی.
«بو ینگی قدم ک‌ی‌پ نینگ اۉز قورالینی برچه اعضاسی بیلن تشلش مقصدی نقطه‌ی نظریدن ایجابي اۉزگریش‌دیر»،-دېیه قۉشیمچه قیلدی او اۉزی‌نینگ ایکس صحیفه‌سیده.
تورکيه کردلری‌نینگ حقوقلرینی حمایه قیلیشینی، اما اَییرمه‌چیلیک حرکتلریگه یۉل قۉیمسلیگینی ایتیب کېله‌دی.
