طالبان و پاکستان یوقاری مرتبهلی رسمیلری، ایکی تامان اۉرتهسیدهگی کینگ تۉقنهشوولردن کېین، آتیش-کېسین کېلیشوویگه قۉل تاپکن اېدی. اوشبو کېلیشوونی یخشیلب عملگه آشیریلیشی و پاکستان و طالبان تارتیشوولریگه سبب بۉلگن مسالهلرگه ییچیم-یۉل تاپیلیشی مقصدیده، ایکی تامان وکیللری اوچ کوندن بیری استانبولده مذاکره اۉتکزیشدی.
اوزاق بحثلردن کېین، بوگون سهشنبه ۶ – عقرب طالبان و پاکستان وکیللرینینگ مذاکرهسی نتیجهسیز یکونلنگنی خبر قیلیندی. بیراق حاضرگچه بو مساله طالبان و پاکستان تامانیدن رسمی تصدیقلنگن اېمس.
مذکور مذاکرهلر شوندی بیرحالده نتیجهسیز یکونلنماقده دیر که نشر اېتیلگن گزارشلرگه کۉره، پاکستان و طالبان «تیتیپی» یا ده پاکستان طالبان تحریکی تهدیدلری خصوصیده کېلیشیب آلالمهگن.
طالبان، پاکستانلیک وکیللرگه افغانستان توپراغیدن پاکستانگه نسبتن ایش آلینیشیگه رخصت بېرمسلیگینی بیلدیرگن بۉلسهده بیراق، پاکستان رسمیلری اېسه بو مساله خصوصیده طالبانگه ایشانمهگن و بو حاکمیتدن کۉپراق ضمانت سۉرهگن.
پاکستان، طالبان حاکمیتگه کېلمسدن ایلگری، دوحهده امریکا بیلن امضا قیلگن کېلیشووی اساسیده، تروریزمگه قرشی کورهشنی بو حاکمیت اساسی بورچی دېب بیلهدی. چونکه بو کېلیشوو اساسیده طالبان بو خصوصده دنیا طلبلریگه اساس حرکت قیلیشینی وعده بېرگن.
اۉتگن تۉرت ییل دوامیده، طالبان دنیانینگ انسان حقلری رعایت اېتیلیشی و کینگ قمراولی حکومت تشکیل اېتیلیشی ضرورلیگی کبی ترورچیلیککه مسالهسی خصوصیده هم مملکتلر رضایتنی قۉلگه کېلتیریشده موفق بۉله آلمهگن.
شو سبب، پاکستان حکومتی طالباننی خودی شو تعهدی اساسیده تیتیپی گه قرشی کورهشده چقیرهدی. طالبان اېسه تیتیپی دن حمایهسی بۉلگن دېگن ادعالرنی رد اېتیب کېلماقده دیر.
حاضر بو مساله اوستیده کېلیشوو قۉلگه کېلمهی، استانبول ییغینی حقیقتن نتیجهسیز یکونلنسه، طالبان و پاکستان اۉرتهسیده ضدیتلر ینهده کوچهیشی و حتا تۉقنهشوولر اۉرتهگه کېلیشینی کوتیش ممکن دیر. چونکه بوندن ایلگری پاکستان مدافعه وزیری خواجه محمدآصف مذاکره نتیجه بېرمهگن تقدیرده «آچیق اوروش» یوز بېریشی ممکنلیگیدن آگاهلنتیرگن اېدی.
طالبان و پاکستان اۉرتهسیده بوندن کېین شوندی بیرحالده ضدیتلر کوچهیشی ممکن دیر که طالبان پاکستان حکومتی طلبی و اۉزینینگ یقین گروهلریدن بۉلمیش «تیتیپی» آرهسیده بیرتهسینی تَنلشده معماگه دوچ کېلدی و آچیق قرار قبول قیلالمهدی.
طالبان و پاکستاننینگ اوشبو کېلیشماوچیلیکلری شوندی بیرحالده دیر که طالبان سونگی وقتلرده، هندوستان بیلن یقینلشیشگه اولگورگن بو مساله اېسه پاکستاننی اچچیقلنتیرگن و شو سبب تارتیشوولر بوندن کېین کینگ مقیاسده دوام اېتیشی ممکن دیر.
پاکستان و طالبان اۉرتهسیدهگی اوشبو تارتیشوولر حاضرگچه هم افغانستان اوچون جدی زیان کېلتیرگن. بو تارتیشوولر سبب چیگرهلر یاپیق قالیشی افغانستاننینگ اقتصادیات و سوداگرلیک ساحهسی اوچون میلیونلب زیان اۉرتهگه آلیب کېلگن.
