تاشقُرغان تنگیسینینگ آرقه‌سیده جایله‌شگن، سمنگان ولایتی فیروزنخچیر اولسواللیگیگه قره‌شلی «قوشموله» قیشلاغی هلی هم ویرانلیک سایه‌سیده نفس آلماقده. بو قیشلاقده ۳۰۰ دن آٰرتیق عایله یشه‌یدی. اوشبو اهالی اۉتگن یکشنبه کېچه‌سیدن بیری آچیق آسمان آستیده، باش پناه‌سیز کون کېچیرماقده.
بیر نیچه کېچه ایلگری ییر سیلکینیب، قوشموله‌نینگ اکثر اوی‌لری ییر بیلن یکسان بۉلدی. قالگن لای‌دن توزالگن اوی‌لر هم چوقور درز قیلگن، ایچیده یشش ممکن اېمس، چونکه دیواری چوکیب کېتگن، تامی توشگن بو اوی‌لر هر لحظه چوکیب کېتیشی ممکن دیر و اهالی اېسه خودی شو خوف سبب تاملرگه کېریب تینچ یاتالمه‌یدیلر. ایندی دیواری درز قیلگن اوی‌لر ایچیده باله‌لریمیز بیلن قنده‌ی تینچ اوخله‌شیمیز ممکن دېب، اوی‌لردن چیققن آدملر باله‌لری بیلن ییرگه توشَلگن کۉرپه و یاستیق‌لرده کون و کېچه اۉتکزماقده؛ دیمک حاضرگی کون و کېچه‌لرده ییر اولرنینگ یگانه باش پناه‌سیگه اَیلنگن.
قیشلاق‌نینگ بیر چیتیده، بیر عیال باله‌لری بغری‌ده جیم اۉتیرگن. آرقه‌سیده یریم قوله‌گن دیوار، قرشی‌سیده اېسه جیم-جیرت دشت چۉزیلگن. باش پناه‌سیز تشویشی بیلن کېله‌جکدن قیغوریب سیکین‌لیک بیلن «همه‌سی کېتدی، اوی‌میز و بار و یۉغیمیزنی زلزله ییر بیلن یکسان قیلدی.» دېب یوره‌ک دردینی آچه‌دی آنه‌خان.
بوگونگچه قوشموله‌گه هیچ قنده‌ی یاردم ییتیب کېلمه‌گن. قیشلاق‌نینگ اوزاق‌لیکده جایله‌شگنی و یۉللر یامان‌لیگی سبب بو حدود احوالی یېتکیرمه‌لر کمره‌سی و انسان‌پرورلیک یاردملرنی ییتکزووچی تشکیلاتلر اعتباری‌دن چیت‌ده قالگن. قوشموله شوندی اعتبارسیز قالهیاتکن قیشلاقلردن بیری دیر که اۉزبېک تی‌وی ایلک بار قیشلاق احوالینی روایت قیلماقده. دستلبکی معلوماتلر اساسیده سونگی زلزله‌دن زیان کۉرگن حدودلرده‌گی کۉپلب قیشلاقلر احوالی هلی تېگیشلی اداره‌لر تامانیدن تیکشیریلمه‌گن، شو سبب زلزله عاقبتیده اۉرته‌گه کېلگن ویرانگرلیکلردن نشر اېتیلگن رقملر، میدانی حقیقت‌دن بیراز اوزاق دیر و ویرانگرلیک اېسه نشر اېتیلگن معلوماتلردن کۉره انچه کۉپراق.
قیش موسومی یقین‌لشماقده و شو سبب هر کېچه اوتیشی بیلن ساووق‌لیک کۉپراق میدانده قالگن زلزله جبردیده‌لرینی اذیت قیله‌دی. اېرته کېچه‌نی، ساووق هواده قنده‌ی اۉتکزیش تشویشی بیلن کوتیب تورگن بو اهالی، احواللریگه کېچ بۉلمه‌ی یاردم ییتکزیلیشینی سۉرهشماقده دیر.
