افغانستان شمال و شمال شرق حدودلریده یوز بېرگن زلزله نتیجه‌سیده آغیر زیانلرنی سمنگان و بلخ ولایتلری اهالیسی کۉردی‌لر. سمنگان ولایتیده زلزله‌دن آغیر زیان کۉرگن حدودلر و تومن‌لردن بیری «دره‌صوف پایین» تومنی دیر که بو تومن‌ده هم اۉتگن یریم کېچه‌سی بیردم‌ده زلزله صادر بۉلیب، کۉپلب اوی‌لرنی توپراق ویرانه‌سیگه اَیلنتیردی.
اۉزبېک تی‌وی اختیاریده قرار تاپکن معلوماتلرگه کۉره، بو تومن‌ده زلزله نتیجه‌سیده بیر کیشی جان بېریب و ینه تۉرت کیشی جراحت آلگن. تومن‌ده زلزله اۉرته‌گه آلیب کېلگن اقتصادی ضربه هم اهالی اوچون آغیر اېدی.
معلوماتلرنی بیلدیریشیچه، کۉپینچه اهالیسی اۉزبېکلر بۉلگن دره‌صوف پایین تومنی‌ده کمیده ۱۱۰ اوی بوتونله‌ی ویرانه‌گه اَیلنگن و ۵۲۷ اوی هم اېسه دیوارلری درز قیلیب، قسمی کۉرینیش‌ده ویران بۉلگن. شونینگدېک بو تومن اهالیسی‌نینگ کمیده ۲۱ چاروه‌سی هم تلف بۉلگن که اهالی اوچون آغیر اقتصادی زیان اېدی.
ایتیلیشیچه دره‌صوف پایین تومنی‌دن ۴۱ قیشلاق اهالیسی زلزله‌دن زیان کۉرگن که حاضرگچه اولرنی احوالیگه ییتیشیش اوچون تېگیشلی اداره‌لر تامانیدن قانقرلی اعتبار قره‌تیلگن اېمس.
اهالی احوال یاردم بیرووچی تشکیلاتلر تیکشیروو تیملری تامانیدن تیکشیریلیب کېتگن بیراق حاضرگچه یاردم ییتیشمهگن و اهالی زلزله زیانلرینی بیرازگینه بۉلسه هم جبران قیلیب، باش پناه‌سیز قالگن اهالی قیش موسومی‌ده اوستی یاپیق بیر اوی‌ده تینچ آلیش همده زلزله‌دن ایلگری بۉلگن عادی حیاتلرینی باشلشلری اوچون یاردم کۉتماقده دیر.
شو سبب بو اهالی یاردم بیرووچی تشکیلاتلر احواللریگه تیزلیک بیلن اعتبار قره‌تیشینی سۉره‌یدیلر.
