تخار ولایتی دشت قلعه تومنیدن محلی منبع‌لرنینگ اۉزبېک تی‌وی گه ایتیشیچه، سونگی کونلرده بو اولسواللیکده‌گی تاریخی مکانلردن بۉلمیش «آیخانم» شهرچه‌سی اطرافیده، ناقانونی قازیش ایشلری گواهی بۉلگنلر.
اهالی‌نینگ ایتیشیچه، بو تاریخی مکان اطرافی‌دن آلتین تاپیش مقصدیده ناقانونی قازیش ایشلری باشلنگن و بو ایشلر هم بیگانه کیشی‌لر تامانیدن ایلگری آلیب باریماقده دیر.
دشت قلعه اهالیسی حاضر قازیش ایشلری آیخانم شهرچه‌سی اطرافیده اېکنینی بیلدیریب، بیراق کونی کېلیب بو شهرچه و بو ییرده‌گی تیپه‌لیک هم قازیلیشی ممکن‌لیگیدن خواطر بیلدیره‌دیلر.
دشت قلعه یشاوچیلریدن بیری‌نینگ اۉزبېک تی‌وی گه ایتیشیچه “قازیش ایشلری آیخانم اطرافیده باشلنگن. اهالی بو ییرده‌گی قالگن اثرلر تالان-تاراج اېتیلیشیدن خواطرده دیر، چونکه طالبان‌نینگ ۲۵ ییل ایلگری حکومتی دوریده شوندی ایش بجریلگن اېدی.”
شونینگدېک اوشبو اهالی، مذکور قازیش ایشلری جدی و زمانه‌وی ماشینه‌لر بیلن بجریلیب تورگنینی معلوم قیله‌دیلر.
عینی حالده دشت قلعه اهالیسی سونگی وقتلرده، بو قازیشلر جریانیده تاریخی تنگه‌لر هم تاپیلگنینی ادعا قیلیب، آیخانم اطرافیده‌گی ییرلر نرخی قیمت‌لشیب کېتگن دېب بیلدیردی.
منبعلردن بیری‌نینگ اۉزبېک تی‌وی گه آرتیق‌لشیچه “قازیش ایشلری ماشین و قۉل بیلن دوام اېتماقده ایتیلیشیچه تاریخی تنگه‌لر هم تاپیلگن. شو اوچون سونگی اوچ الی آلتی آی ایچیده، آیخانم اطرافیده‌گی ییرلر نرخی کوتاریلگن.”
ایریم منبع‌لر و خبرلرگه کۉره، دشت قلعه تومنی‌ده بو قازیش ایشلری طالبان همکارلیگیده، چین وطنداشلری تامانیدن بجریلماقده دیر.
طالبان اېسه حاضرگچه بو خصوصده هیچ قنده‌ی مناسبت بیلدیرگن اېمس.
ایتیش کېرهک که آیخانم تاریخی شهرچه‌سی یالغیز بیر تیپه‌لیککه خلاصه بۉلمه‌ی تیپه‌لیک اطرافیده‌گی ییرلر هم تاریخی مکان دیر و شو سبب بو ییرلرده هم تاریخی تنگه‌لر و قیمت بها اشیالر موجودلیگی ممکن.
دیمک طالبان‌نینگ تۉرت ییل حکومتی دوامیده، باشقه تاریخی مکانلرده هم شوندی ناقانونی قازیلیش‌لر قید اېتیلگن اېدی.
