سمنگان ولایتی‌نینگ زلزله‌دن آغیر زیان کۉرگن ینه بیر اولسواللیگی فیروزنخچیر تومنی دیر که زلزله مرکزی بۉلمیش تاشقرغان‌ده یقین بو تومن هم زلزله نتیجه‌سیده آغیر ویرانگرلیکلرگه اوچره‌دی.
اوشبو تومن‌نینگ ۱۵ قیشلاغیده زلزله اۉرته‌گه آلیب کېلگن زیانلرگه اۉزبېک تی‌وی قۉل تاپکن که بو معلوماتلر اساسیده، مذکور قیشلاقلرده ۶۱۴ اوی بوتونله‌ی یاده قسمی ویران بۉلگن.
بو گزارش‌ده قوشموله، رحمت آباد، چهارسوق، اوزان، زلزل آباد، فقیرآباد، گمبتان، لب آب، خواجگی، تولگی، ملکان، چنارگی بالا، چنارگی پایین، نوآباد و بورمه قیشلاقلریده زلزله عاقبتیده اۉرته‌گه کېلگن زیانلر تیکشیریلگن.
اوشبو قیشلاقلرده ویران بۉلگن ۶۱۴ اوی جمله‌سیدن ۲۲۷ ته سی بوتونله‌ی و قالگن ۳۸۷ ته سی قسمی ویران بۉلگن.
بونگه قوشیمچه فیروزنخچیر تومنی‌ده، سونگی زلزله نتیجه‌سیده ۵۴ کیشی یره‌لنیب و ۶۸ باش چاروه تلف بۉلگن.
فیروزنخچیر تومنی‌ده کۉپلب ویرانگرلیکلر قوشموله قیشلاغیده یوز بېریب، بو قیشلاقده ۱۵۱ اوی ویران بۉلیب و ۱۱ کیشی یره‌لنگن.
زلزله نتیجه‌سیده باش‌پناه‌سیز قالگن اهالی یاردم بیرووچی اداره‌‍لر و تشکیلاتلردن شاشیلینچ یاردم کوتماقده‌لر. اولرنینگ تاکیدلشیچه قیش موسومی‌ده باش پناه توزاتمه‌گن تقدیرده آغیر و اچینرلی احوالده توشیب قاله‌دیلر.
