تورکیه‌نینگ استانبول شهری میزبان‌لیگیده، پاکستان و طالبان وکیللری اۉرته‌سیده‌گی مذاکره‌لر نتیجه‌سیز یکونلنگندن بیری ایکی تامان بیر-بیراوینی عیب‌لب اۉزلرینی مذاکره‌ده حق اېکنینی اثبات‌لش اوچون اورینیب کېلماقده دیر.
طالبان یوقاری مرتبه‌لی رسمی‌لری اینقسه بو حاکمیت تشقی ایشلر وزیری امیرخان متقی، سونگی کونلر ایچیده بیر نیچه بیاناتیده، استانبول مذاکره‌سی موفقیت‌سیزلیگیگه پاکستان‌نی عیب‌دار دېب، بو مملکت تۉرت ییل دوامی‌ده افغانستان ایرکین‌لیگینی بوزگنینی معلوم قیلدی.
شونینگدېک پاکستانده هم بو مملکت رسمی‌لری، مذاکره‌لر موفقیت‌سیزلیگیگه طالباننی عیب‌دار بیلیب، طالبان حاکمیتیده بۉلگن افغانستانده پاکستانگه قرشی خوفسیزلیک حرکتلر موجودلیگینی ادعا قیلیب کېلماقده.
یقین‌ده بیرلشکن ملتلر تشکیلاتی خوفسیزلیک کېنگشی ییغینی‌ده، پاکستان وکیلی عاصم افتخار احمد، افغانستانده قورال و حربی امکانیت‌لر ییریک انباری موجودلیگی و بو مملکتده ترورچی گروهلر فعاللیگیدن خواطر بیلدیرگن.
دیمک بو بیلن پاکستان حکومتی، دنیا مملکتلرینی طالبانگه قرشی ترورچیلیک حمایه‌سی ادعاسینی اثبات‌لش اوچون اورینیب تورگنی کۉرینه‌دی.
پاکستان و طالبان بو تارتیشوولری شوندی بیرحالده دیر که یقین‌ده، ایکی تامان اۉرته‌یسیده مذاکره‌لر قیته باشلنیشی خصوصیده سعی‌وحرکتلر هم باشلنگن.
سونگی کونلرده ایران تشقی ایشلر وزیری سیدعباس عراقچی، طالبان و پاکستان تشقی ایشلر وزیرلری بیلن علیحده تلیفونی ملاقات قیلیب، سۉزلشوولر قیته باشلنیشینی تاکیدلدی.
شونینگدېک تورکیه جمهور باشلیغی رجب طیب اردوغان هم کېلهسی هفته ایچیده، یوقاری مرتبه‌لی بیر هیات‌نی پاکستان جونه‌تیب، اوشبو تارتیشوولر خصوصیده گپ‌لشیش‌نی بویورگنی اَیتیلماقده دیر.
بو سعی‌وحرکتلر دوامی‌ده، پاکستان مدافعه وزیری خواجه محمدآصف، تورکیه و قطر مملکتلری تکلیف قیلگن تقدیرده، طالبان بیلن ینه مذاکره اۉتکزیش‌ده تیار اېکنلرینی اعلام قیلگن.
پاکستان شوندی بیرحالده بو خصوصده تیارگرلیک کۉرسه‌تماقده دیر که ایشانچلرگه کۉره، طالبان و پاکستان اۉرته‌سیده‌گی تی‌تی‌پی معماسی خصوصیده قوله‌یلیک بیلن بیر کېلیشوو قۉلگه کېلیشی ممکن اېمس دیر.
ایش بیلرمان کیشی‌لرنینگ ایتیشیچه، بو خصوصده پاکستان و طالبان ایکله‌سی هم قیزیل چیزیغلریدن قۉل تارتیشگه تیار اېمس و شو سبب ایکی تامان کېلیشووگه قۉل تاپیشی انچه قییند کۉرینه‌دی.
