پاکستان مدافعه وزیری خواجه آصف بوگونگی پارتلشنی مملکت اوچون «جدّي آگاهلنتیریش» دېب اته‌ب، طالبان اېندیلیکده اوروشنی پاکستان حدودیگه کۉچیرگنی حقیده بیانات بېردی.
آصف سه‌شنبه کونی، 20- عقرب، اجتماعي ترماق ایکس صحیفه‌سیده شونده‌ی یازدی: بونده‌ی شرایطده طالبان بیلن مذاکره‌لر نینگ موفقیتیگه امید باغلش بې‌فایده بۉله‌دی.
اونینگ سۉزلریگه کۉره، طالبان پاکستانده ترورچیلیک هجوملری نینگ آلدینی آلیش امکانیگه اېگه.
پاکستانلیک بو رسمي شونینگدېک تأکیدله‌دی: اوروشنی اسلام آبادگچه آلیب کېلیش طالبان تامانیدن یوباریلگن بیر خبر بۉلیب، پاکستان بونگه قطعي جواب بېریش امکانیتیگه اېگه.
خواجه آصف شونده‌ی قۉشیمچه قیلیشیچه: «پاکستان اوروش حالتیده‌دیر. کیم‌که بو مملکت اوردوسی فقط افغانستان-پاکستان چېگره‌لری و بلوچستان نینگ اوزاق حدودلریده جنگ قیلماقده، دېب اۉیله‌سه، بوگونگی اۉز جانینی فدا قیلووچی هجومنی آگاهلنتیرووچی قۉنغیراق صفتیده قبول قیلسین. بو بوتون پاکستان اوچون اوروشدیر، اونده اوردومیز هر کونی فداکارلیک کۉرسه‌تماقده و خلقگه خوفسیزلیک تویغوسینی بخش اېتماقده»
پاکستان مدافعه وزیری بو بیاناتنی بوگون ساعت 12:30 اطرافیده یوز بېرگن پارتلشدن سۉنگ ایتدی؛ حادثه نتیجه‌سیده 12 کیشی هلاک بۉلگن و 21 دن آرتیق کیشی یره‌لگن.
