جوزجان ولایتیده طالبان محلی مسووللری اۉزبېک تیلیگه قرشی بیر حرکت‌نی عملگه آشیریب، بو ولایت بیلیم یورتی عمومی دروازه‌سیده‌گی اۉزبېکچه یازوونی اوچیردی و اۉرنیده باشقه لوحه قوندیردی.
اوشبو حرکت کینگ تنقیدلر و ناراضلیکلرگه سبب بۉلیب، جدی مناسبت‌لرنی اۉرتهگه آلیب کېلگن که قۉییده اوشبو مناسبت‌لردن بیر قنچه‌سینی اۉقینگ!
ییلماز: خلق تیلینی اوچیریشگه هیچ بیر کوچ‌نی حقی یۉق
تورکیه‌ده بیلیم یورت استادی و تانیقلی فعاللردن عالیه ییلماز اۉز فیسبوک صحیفه‌سیده بو خصوصده مناسبت بیلدیریب، جوزجان تورکلر یورتی و اۉزبېک تیلی اېسه بو یورت‌نینگ اۉزلیگی دېب تاکیدلگن.
شونینگدېک خانم ییلماز جوزجان بیلیم یورتی ایشیگی‌دن اۉزبېکچه لوحه کوتاریلیشینی قاره‌لب، خلق تیلینی اوچیریش هیچ بیر کوچ‌نی حقی اېمس دېب بیلدیرگن.
عینی حالده خانم ییلماز، بو حرکتگه قرشی کینگ کوره‌شیش‌نی هم تکلیف قیلگن.
بارز عزیزی: بوندن کۉره آیدین تعصب بۉلمسه کېره‌ک
جوزجان بیلیم یورتیده اۉزبېک تیلی‌ده‌گی لوحه اوچیریلیشی برابریده‌گی مناسبت‌لر دوامی‌ده، یاش شاعر و فعاللردن اسدالله بارز عزیزی بوندن کۉره آیدین تعصب بۉلمسه کېره‌ک دېب مناسبت بیلدیرگن.
فیسبوک صحیفه‌سیده بیانات یازیب، بو حرکتگه نسبتن اۉز قرشی‌لیگینی بیلدیرگن بارز عزیزی ” بیزنینگ تیلیمیزنی عالیگاه لوحه‌سیده کۉریب، چیده‌ب ببلمه‌گنلر، قنده‌ی شرم‌سیزلیک بیلن مومن‌لیک ، مسلمانلیک و اولکه داشلیک دعواسینی قیلماقده‌لر؟” دېب تاکیدلدی.
عبید: خلق‌نینگ اۉز تیلیگه بۉلگن سیوگی‌سینی اوچیرالمه‌یدیلر
یاش فعاللردن نقیب الله عبید، جوزجان بیلیم یورتی‌نینگ اۉزبېکچه لوحه‌سی کوتاریلگنیدن تنقید قیلیب، اکثریت جمعیتی اۉزبېکلر بۉلگن جوزجانده بو ایش بجریلیشی بیلن خلق‌نینگ اۉز تیلیگه بۉگن سیوگی‌سینی اوچیرالمه‌یدیلر، دېب تاکیدلدی.
نقیب الله عبید بو حقده نشر قیلگن بیاناتیده، تیل بیلن قرشی‌لیک هیچ قچان بیرلیک آلیب کېلمس‌لیگینی هم بیلدیرگن.
تویغون: اۉزبېک تیلی رسما یۉق قیلیندی
جوزجان بیلیم یورتی عمومی دروازه‌سیده‌گی اۉزبېکچه لوحه کوتاریلیشی برابریده‌گی مناسبت‌لر دوامی‌ده، مذکور بیلیم یورت اۉقیتووچیلریدن حسام الدین تویغون بو حرکت‌نی اۉزبېک تیلی یۉق قیلیشینی دېب بهاله‌گن.
تویغون جنابلری بو حقده قیسقه قیلیب یازیشیچه “اۉزبېک تیلی رسما یۉق قیلیندی.”
یارقین: فعاللر عبدالسلام حنفی‌گه اعتراضلی عریضه‌لر تاپشیرسین
جوزجان ولایتی بیلیم یورتیده اۉزبېکچه لوحه آلیب تشلنیشی برابریده‌گی ناراضلیکلر دوامی‌ده، تیلی‌میزنینگ تانیقلی بیلیمدان و یازووچیلریدن محمدحلیم یارقین جنابلری، فیسبوک صحیفه‌سیده یازگن بیاناتیده، اۉزبېک تیلی حتا اۉز اوییده هم قرشیلیککه اوچره‌بدی، دېب بیلدیرگن.
یارقین جنابلری‌نینگ تاکیدلشیچه، بو حرکت تیلی‌میز و سۉزلاوچیلریگه یازوولیک دیر.
شونینگدېک یارقین جنابلری، فعاللردن اعتراضلی عریضلر تیارلب، حاضرگی حکومت باش وزیری اۉرین باسری عبدالسلام حنفی‌گه تاپشیریشیینی طلب قیلگن.
قووانچ: اۉزلیگینی اسره‌لش اوچون هر بیر اۉزبېک کوچلی آواز چیقرسین
بیلیم یورت استادی و یازووچی احسان الله قووانچ، جوزجان ولایتیده اۉزبېکچه یازوو کوتاریلیشی برابریده مناسبت بیلدیریب، اۉزلیگینی اسره‌آلمه‌گن هر بیر انسان‌نینگ هر مقام و منصبده هم بۉلسه، تیریک اېمس، بلکه اولیک انسان حسابلنه‌دی دېب، ناراضلیک بیلدیرگن.
شوونینگدېک قووانچ، بو حرکت‌نی اۉزبېک خلقی‌گه کتته اهانت و کیچیریلمس حرمت‌سیزلیک دېب بیلدیرگن.
بونگه قوشیمچه بیلیم یورت بو استادی، اۉزلیگینی اسره‌ش اوچون هر بیر اۉزبېک کوچلی آواز چیقریشینی هم تکلیف قیلگن.
نوری: نیگه جیم و کېله‌جک نسلده جواب‌سیز بۉله‌یلیک؟
جوزجانده اۉزبېکچه لوحه کوتاریلیشی برابریده ناراضلیکلر دوام اېتر اېکن، یاش فعاللر یارمحمد نوری بو حقده بیلدیرگن مناسبتده، جیم بۉلمسلیکنی اورغوله‌گن.
اونینگ تاکیدلشیچه، بوگون جیم بۉلگن تقدیرده، تیل، ایل و تاریخ یۉقالیب، کېله‌جک نسلده جواب‌سیز بۉله‌میز دېب بیلدیرگن.
توران: تیل‌نی یۉق قیلیش اوچون حرکت قیلگنلر خلق آزادلیگیدن قۉرقه‌دی
جوزجان بیلیم یورتیده اۉزبېکچه یازیلگن لوحه کوتاریلیب اۉرنیده باشقه لوحه قوندیریلیشی برابریده‌گی مناسبلر دوامی‌ده یاش فعاللردن بسم الله بیک توران، بو حرکتگه قۉل اۉرگن شخص‌لر خلق آزادلیگیدن قۉرقه‌دی دېب بیلدیرگن.
یاش فعاللردن بو کیشی‌نینگ یازیشیچه “ تیل نی یۉق قیلیش اۉچون حرکت قیلگنلر، اصلیده او خلق نینگ اویغاق تفکری و تیل نینگ یوره‌گیده‌گی آزادلیکدن قۉرقه‌دیلر.”
احدی: باشقه تیللرنی یۉق قیلیشگه اورینیش قومی دولت‌لیگیدن دلالت بېره‌دی
یاش فعاللردن و ژورنالیست نصرت الله احدی، جوزجانده اۉزبېکچه لوحه کوتاریلیشینی قومی بیر حرکت دېب بهاله‌گن.
احدی بو حقده یازگن بیاناتیده، اسلام حامیسی‌میز دېب دعوا قیله‌یاتکنلرنی، بو حرکتی اسلامی اېمس بلکه خاص بیر قوم اوچون بۉلگنیدن دلالت بېره‌دی دېب تاکیدلگن.
شونینگدېک احدی، حاضرگی حکومت چوکاتیده‌گی اۉزبېک سیمالردن هم تنقید قیلیب، اولر صلاحیت‌سیز و سمبولیک بۉلگنلرینی اورغوله‌گن.
احدی بو مساله خصوصیده سکوت سقله‌گن تقدیرده آینده‌گه عاقبت‌میز بوندن هم یامان بۉله‌دی دېب آگاه‌لنتیردی.
