جوزجانده اۉزبېک تیلی‌گن نسبتن کۉرسه‌تیلگن ضدیت آرتیدن باشلنگن کینگ مناسبت‌لر دوامی‌ده، فرانسه مهاجرلر پارلمانی اعضاسی همده شاعر و ژورنالیست سیاره رحمانی هم بیر بیانات یازیب، طالبان حاکمیتیده اۉزبېک تیلی احوالی‌دن خواطر بیلدیردی.
خانم رحمانی اۉتگن تۉرت ییل دوامی‌ده، طالبان تامانیدن اۉزبېک تیلی و مدنیتی‌گه قرشی آلینگن قرار اینقسه بیلیم یورتلرده اثرلر اۉزبېک تیلی‌گه یازیلمس‌لیک قراری، اۉزبېک تیلی رسمی مقامی تَن آلینمس‌لیگی همده اۉزبېک تیلیده بۉلکن یازوولر و لوحه‌لر آلیب تشلنیشیدن اېسلب، آنه تیلیمیزنی حمایه قیلیش اوچون قیسقه یۉل-خریطه‌سینی تکلیف قیلدی.
خانم رحمانی بیرینچی بۉلیب ایچکی و تشقی محیطده فعالیت یوریتووچی‌لر اۉرته‌سیده مستقل بیر اۉزبېک تیلی حمایه قیلیش کمیته‌سی توزیلیشینی کېره‌ک دېب، بو کمیته آرقه‌لی تیلگه نسبتا بۉله‌یاتکن چیکلاولر، یازوولر و لوحه‌لرنینگ آلیب تشلنیشی حجت‌لشتیریب، خلق‌ارا مقیاسده اعلان قیلینیشینی بیلدیردی.
شونینگدېک خانم، افغانستانده اۉزبېک تیلی احوالی خصوصیده بیرلشکن ملتلر تشکیلاتی اینقسه یونسکو کبی تشکیلاتلرگه مراجعت یوباریب، خلق‌ارا باسیمنی کوچه‌یتیریش‌نی باشقه بیر چاره اوله‌راق تکلیف اېتیلگن.
بونگه قوشیمچه اوشبو بیاناتده، اجتماعی ترماقلرده «تیلی‌میز، بیزنینگ شانیمیز» کبی شعارلر بیلن سیس چیقاریش هم باشقه بیر ییچیم-یۉل اوله‌راق بیان قیلینگن.
باشقه بیرتاماندن خانم رحمانی، هیچ بیر سیاست و هیچ بیر حاکمیت خلق‌نینگ تیلی اوستیدن حُکم چیقاریشگه قادر اېمس دېب، بوگون بو وضعیت برابریده جیم توریش، ایرتنگی اولاد سکوتینی تیارلش دېب آگاهلنتیرگن.
ایتیش کېره‌ک که اۉتگن کوندن بیری، طالبان‌نینگ اۉزبېک تیلی‌گه نسبتن ضدیت‌لر و حرکتلر کینگ تنقید آستیده آلینماقده دیر.
