افغانستان آزادلیک جبههسی نینگ ایتیشیچه، کوچلری یکشنبه کونی 9- قوس کېچه کېچقرون ساعت 6:00 ده فاریاب مرکزی بۉلگن میمنه شهریده طالبان نینگ امر بلمعروف و نهی از منکر باشقرمهسیگه هجوم قیلگن.
جبهه نینگ ادعاسیگه کۉره، اوشبو هجومده طالبان نینگ ایکّی نفر امر بالمعروف خادیمی اۉلدیریلگن و ینه ایکّی نفری جراحتلنگن.
“افغانستان آزادلیک جبههسی ” بو هجوم طالبان نینگ مذکور باشقرمسیدهگی خادملری بنادن چیقهیاتگن پیتده عملگه آشیریلگنینی بیلدیرگن.
طالبان نینگ امر بالمعروف و نهی از منکر وزیرلیگی اېسه بوگون اېرتهلب بیانات چیقریب، بو هجوم برطرف اېتیلگنینی ادعا قیلگن.
مذکور وزیرلیک نینگ مطبوعات شۉزلاوچیسی سیف الاسلام خیبر ایکس اجتماعي ترماغیده اعلام قیلگن خبریده، کېچقرون ساعت 6:00 ده میمنهدهگی باشقرمسیگه هجوم قیلماقچی بۉلگن بیر هجومچی مقصدیگه یېتمسدن قۉلگه آلینگنینی ایتگن.
او هجوم حقیده قۉشیمچه تفصیلات بېرمهگن.
“افغانستان آزادلیک جبههسی” ایتیشیچه، طالبان نینگ امر بالمعروف رهبری هم هجوم نشانلریدن بیری بۉلگن، اما اونینگ تقدیری حقیده حلی معلومات یۉق.
جبهه قۉشیمچه قیلشیچه، طالبان نینگ امر بالمعروف خادملری هر کونی اوشبو باشقرمهده تۉپلنیب، سۉنگره اوچ-بېش کیشیلیک گروهلرگه بۉلینیب، “اینیقسه عیاللرنی بېزاوته قیلیش مقصدیده میمنه شهریده یورهدیلر”.
آزادلیک جبههسی اوّل هم طالبان نینگ امر بالمعروف خادملریگه قرشی هجوملر حقیده خبر بېرگن اېدی.
بو جبهه، طالبان نینگ “بدحجابلیک” بهانهسی بیلن کۉچهلردن قیزلرنی عامهوي طرزده حبسگه آلگنیدن سۉنگ، اوشبو خادملرنی نشانگه آلیشینی اعلام قیلگن اېدی.
