تخاردهگی منبعلر خبر بېریشیچه، چاهآب تومنی اهالیسی تامانیدن اۉتکزیلگن ناراضیلیک نمایشلری چاغیده اوچ نفر اعتراضچی طالبان تامانیدن اۉلدیریلگن، ینه آلتی کیشی جراحتلنگن.
بیر نېچه کوندن بېری چاهآب اولسواللیگی اهالیسی آلتین کانلری نینگ حددن تشقری قزیب آلینیشی و بو نینگ سوو منبع سیگه یېتکزهیاتگن ضرری سبب ناراضیلیک بیلدیرماقده.
منبعلرگه کۉره، اوشبو ناراضیلیک تیناوون (دوشنبه، 15-جدی) زۉراورلیککه ایلنیب کېتگن.
اجتماعي ترماقلرده ترقهلگن بیر لوحهده طالبان اعضاسی نمایشچیلر تامانگه اۉق اوزهیاتگن پیتده نمایشچیلر تامانیدن کلتکلنگنی عکس اېتگن.
منبعلر نینگ ایتیشیچه، نمایشچیلر و طالبان اۉرتهسیدهگی تۉقنشووده اوچ نفر نمایشچی طالبان تامانیدن اۉلدیریلگن، ینه آلتی کیشی جراحتلنگن.
تصدیقلنمهگن خبرلرگه کۉره، بیر نفر طالبان اعضاسی هم نمایشچیلر تامانیدن اۉلدیریلگن.
منبعلر، شونینگدېک، نمایشچیلر قزیب آلیش بیلن شغللنووچی شرکت نینگ ملکینی یاقیب یوبارگنینی اَیتماقده.
طالبان افغانستاندهگی یېر آستی بایلیکلرینی، جملهدن تخار و بدخشاندهگی آلتین کانلرینی کېنگ کۉلمده قزیب آلیشگه کیریشگن. بو اېسه محلي اهالی ناراضیلیگیگه سبب بۉلماقده.
تأکیدلش جایزکی، طالبان جاري ییل یازیده بدخشان ولایتی اهالیسی نینگ کۉکنار اېکینلری یۉق قیلینیشیگه قرشی ناراضیلیکلرینی هم کوچ بیلن باستیرگن اېدی. بیرلشکن ملتلر تشکیلاتی معلوماتلریگه کۉره، اوشبو باستیریشلر دوامیده کمیده 10 نفر نمایشچی طالبان تامانیدن اۉلدیریلگن.
