بریتانیانینگ افغانستان بۉییچه نمایندهسی ریچارد لیندسی طالبان محکمهلرینینگ جنایت اصولنامهسیگه مناسبت بیلدیرر اېکن، عدالتلی و تینچ افغانستان مملکتدهگی برچه یشاوچیلرنینگ حقلریگه حرمت کۉرسهتیلیشینی طلب اېتیشینی ایتدی.
اونینگ تأکیدلشیچه، طالبان محکمهلرینینگ جنایت اصولنامهسی بونینگ عکسینی کۉرسهتهدی. یعنی، طالبان عیاللر، آزچیلیکلر و مجبوري معیارلرگه بۉیسونمهگن شخصلرگه قرشی کمسیتووچی قانونلرنی جاري قیلگن.
طالبان رهبری یقینده اوشبو گروهنینگ «محکمهلر جنایت اصولنامهسی»نی تصدیقلهگن.
مذکور اساسنامهنینگ اجراسی کېنگ کۉلملی مناسبتلرگه سبب بۉلدی و تورلی سیاسي آقیملر اونینگ عاقبتلرینی خواطرلی، دېب بهالهدی.
اوشبو اساسنامهده عیاللر و بالهلرگه نسبتاً زۉرآورلیک فقط آغیر جسماني زۉرآورلیک بیلن چېکلنگن بۉلیب، روحي و جنسي زۉرآورلیک تعقیقلنمهگن.
شونینگدېک، طالبان حنفی مذهبی ایزداشلریدن تشقری باشقه اسلامي مذهب نمایندهلرینی «بدعتچی» دېب اتهب، اجتماعي طبقهلنیش و قوللیکنی قانونيلشتیرگن.
طالبان عدلیه وزیرلیگی اوشبو گروه محکمهلرینینگ جنایت اصولنامهسیگه بیلدیریلگن تنقیدلرگه جوابن، طالبان قانونلریگه اعتراض بیلدیریش شرعاً جنایت اېکنینی و ناراضیلیک بیلدیرگن شخصلر جنایي جوابگرلیککه تارتیلیشینی معلوم قیلدی.
وزیرلیکنینگ تأکیدلشیچه، طالباننینگ قانونچیلیک حجتلری قرآن، سنت و «حنفی فقهنینگ ایشانچلی کتابلری» اساسیده ایشلب چیقیلهدی و اولرگه قرشی چیقیش شریعتگه قرشی چیقیش حسابلنهدی.
