بیرلشگن ملتلر تشکیلاتینینگ آزیق-آوقت و قیشلاق خۉجهلیگی تشکیلاتی (فائو)نینگ اعلان قیلیشیچه، اونگه بیرلشگن ملتلر تشکیلاتی بالهلر جمغرمهسی ( یونیسف) و فرانسه حکومتی بیلن همکارلیکده شرقي افغانستاندهگی زلزله تأثیریگه اوچرهگن جمعیتلرگه آزیق-آوقت خوفسیزلیگینی تیکلش، طعاملنیشنی یخشیلش و یشش درجهسینی حمایه قیلیش بۉییچه یاردم کۉرسهتهدی.
فائو معلوماتیگه کۉره، فرانسه زلزلهدن ضرر کۉرگنلر اوچون آزیق-طعام خوفسیزلیگینی یخشیلش مقصدیده ایکّی میلیون یورو اجرهتگن. اوشبو مبلغ اوی شرایطیده آزیق-آوقت ایشلب چیقریشنی کوچهیتیریش، آزوقهوي و ضرور خدمتلرگه کیریشنی یخشیلش اینیقسه عیاللر و بالهلر آرهسیده آچرچیلیکنی کمهیتیریشگه صرفلنهدی.
فائو اوشبو لایحهدن کنر و ننگرهار ولایتلریده ۵۱ مینگ کیشی فایده کۉرهدی؛ بو یېرده عایلهلر۲۰۲۵ییل اگستدهگی زلزله تأثیریده، آزیق-آوقت خوفسیزلیگی و آغیر آچرچیلیک معمالری کوچهیگن پیتده عذاب چېکماقده دېدی.
فرانسه اروپا و تشقی ایشلر وزیرلیگی گوبل ایشلر بۉییچه مدیری سالینا گرنه-کاتالانونینگ ایتیشیچه، اوشبو لایحه آرقهلی فرانسه، فائو و یونیسف «افغانستان اهالیسی، اینیقسه آچرچیلیککه اېنگ ضعیف بۉلگنلر، خصوصاً عیاللر و بالهلرگه انیق یېچیملر تقدیم قیلیشیمیز ممکنلیگینی کۉرسهتهدی.»
اونینگ قۉشیمچه قیلیشیچه: «آزیق-آوقت خوفسیزلیگی و طعاملنیش نهفقط انسان پرورلیک و رواجلنیش مسألهلری، بلکه تینچلیک، اجتماعي برقرارلیک و عمومي خوفسیزلیکنینگ اساسلری حسابلنهدی، بونده همهمیز اشتراک اېتهمیز.»
جهان آزیق-آوقت دستوری معلوماتیگه کۉره، بوتون افغانستانده۳.۷میلیون باله و۱.۲میلیون عیال آغیر آچرچیلیکدن اذیت چېکماقده.
بو ییل۱۷.۴میلیون کیشی جدّي آزیق-آوقت خوفسیزلیگی معماسیگه دوچ کېلیشی کوتیلماقده؛ اولردن۴.۷ میلیونی فوقالعاده وضعیت (تۉرتینچی فاز) بیلن یوزلشهدی.
چونکه انقراض چوقورلشماقده، افغانستانگه انسان پرورلیک یاردم کمهیماقده.
