طالبلرنینگ کانلر و پترولیم وزیرلیگینینگ معلوم قیلیشیچه، بدخشانده۱۰۰ مینگدن آرتیق آدم تۉغریدن-تۉغری یاکه بالواسطه آلتین قزیب چیقریش بیلن شغللنماقده.
وزیرلیک خبریگه کۉره، آلتین قزیب آلیش بدخشاننینگ شهری بزورگ، یاوان، کوهستان، راغستان، خواهان و ارغنجواه اولسواللیکلریده عملگه آشیریلماقده. اولرنینگ تأکیدلهشیچه، بو ایشلر نهفقط اهالی اوچون ایش اۉرینلرینی یرهتگن، بلکه منطقهنینگ اقتصادي حالتینی سېزیلرلی درجهده یخشیلهگن.
وزیرلیکنینگ معلوم قیلیشیچه، ایلگری ایش بیلن باغلیق معمالرگه دوچ کېلگن محلي اهالی اېندی اوشبو لایحهلر آرقهلی کونلیک درآمد آلماقده.
بوندن تشقری، طالباننینگ کانلر و پترولیم وزیرلیگی بدخشانده پودرتچی کمپنیلر تامانیدن۲۲۳ میلیون افغانيلیک لایحهلرینی ایشگه توشیرگنینی بیلدیرگن، اولر یۉللر، سوو تأمیناتی ترماقلری و باشقه مهم لایحهلرینی، شونینگدېک، کوکچه دریاسی اوستیده بېشته کتّه کۉپریک قوریلیشینی اۉز ایچیگه آلهدی.
وزیرلیک شونینگدېک، مملکت مینیراللریدن قانوني فایدهلنیش و شفّاف باشقروونی ایش ترتیبینینگ اوستوار یۉنهلیشی اېکنینی تأکیدلهگن، مقصد اېسه ملي اقتصادیاتنی مستحکملش و کانلر اطرافیدهگی اهالینینگ برقرار فایده آلیشینی تأمینلش دیر.
شو بیلن بیرگه، مخالفلر بو ایشلرنی مملکت طبیعی منبعلرینینگ تالان-تاراج قیلینیشی صفتیده قبول قیلماقده و خواطر بیلدیرماقده.
معلوم بۉلیشیچه، طالبان بدخشان و تخار کانلرینی چین کمپنیلریگه بېریب، اولر تامانیدن نظارتسیز آلتین قزیب چیقریلیشی دوام اېتماقده. یقینده تخارنینگ چاه آب منطقهسیدهگی محلي اهالی کانلرنینگ حددن تشقری ایشلهتیلیشی و سوو منبعلریگه ضرر یېتکزیلهیاتگنینی تنقید قیلیب، ناراضیلیک بیلدیرگن، اما طالبان اولرنی باستیریب، اوچ نفر ناراضینی اۉلدیرگن.
