تورک – اۉزبېک خلقی نینگ پارلاق یولدوزی و تانیقلی شاعری امیرالکلام میر علیشیرنوایینینگ یاد و خاطرهلریدن یادلش و اونینگ علمی و ادبی میراثلرینی قدرلش مقصدیده بلخ ولایتینینگ مرکزی مزار شریف شهریده امیرعلیشیرنوایی نامیده بیر چهار راهه قوریلیشینینگ توب تاشی قۉییلدی.
بلخ ولایتیده اۉزبېکستان قونسلگرلیگی رسمیلرینینگ ایتیشیچه، بو چهارراهه بلندلیگی ۱۵ متر و قوریلیش خرجتی ۲۰۰ مینگ دالر بۉلیب کېلهسی اوچ آی ایچیده قوریلیش ایشی یکونلنهدی.
اۉزبېکستاننینگ بلخ ولایتیدهگی قونسلی جعفر فتایوفنینگ تاکیدلشیچه، بو چهارراهه امیرعلیشیرنوایی نینگ یادی و اېسدهلیکلرینی منگو سقلش مقصدیده قوریلهدی.
شوندهی بیرحالده اوشبو چهار راهه آچیلیش مراسمیده قتنشگن بیر قطار فرهنگیلر، امیرعلیشیرنوایی نامیده بو کبی تاریخی بنالر قوریلیشینی اونینگ یاد و اېسدهلیکلری منگو قالیشی یۉللریده کتّه تاثیری بارلیگینی تیلگه آلگنلر.
شونینگدېک، اۉزبېکستان مملکتی بو چهارراهه قوریلیشی قۉشیمچه بلخ ولایتیده بویوک بیر مدرسه قوریلیش ایشینی هم باشلهگن و قوریلیش ایشی تېز یقینده باشلهنیشی ایتیلهدی.
بو چهارراهه شوندهی بیرحالده بلخ ولایتینینگ مرکزی مزار شریف شهریده قوریلهدی، بوندن آلدین مزار شریف شهریدهگی امیرعلیشیرنوایینینگ هیکلی طالبان رسمیلری آرقهلی بوزیلگن اېدی، طالبان نینگ بو اقدامی خلق نینگ کېنگ ناراضیلیکلریگه سبب بۉلدی. ناراضیلیکلر آرتیدن طالبان رسمیلری بو ولایتده امیر علیشیر نوایی نامیده بیر کتیبه قوریلیشینی ایتگن اېدی.
