طالبلر تشقی ایشلر وزیرلیگینینگ معلوم قیلیشیچه، اولر دنیس کویل آتلی امریکا وطنداشینی قماقدن آزاد قیلگن.
بیاناتگه کۉره، بو مسأله زلمی خلیلزاد دنیس کویل نینگ عایله اعضاسی و بیرلشگن عرب امیرلیگینینگ کابلدهگی اېلچیسی اشتراکیده امیرخان متقی بیلن اۉتکزیلگن اوچرهشوودن سۉنگ حل اېتیلگن.
طالبان تامانینینگ بیلدیریشیچه، دنیس کویلنینگ عایله اعضالری هبتالله آخوندزادهگه مراجعت قیلیب، اونینگ عفو اېتیلیشینی سۉرهگن. شوندن سۉنگ طالبان عالي محکمهسی اونینگ جزا مدتینی یېترلی دېب تاپیب، آزادلیککه چیقریش حقیده قرار چیقرگن.
طالبان بو قرارنی «انسانپرورلیک و یخشی نیت» اساسیده قبول قیلینگنینی ایتیب، بو قدم امریکا قۉشمه ایالتلری بیلن اۉز ارا ایشانچنی مستحکملشگه خدمت قیلیشیگه امید بیلدیرگن.
دنیس کویل ۲۶- جنوریده کابلدهگی طالبان استخبارات تامانیدن «قانونلرنی بوزیش» عیبلاوی بیلن حبسگه آلینگن اېدی. اونینگ آزاد اېتیلیشی امریکا تامانیدن طالبان نظارتیدهگی افغانستان «ناقانوني حبسلر عملگه آشیرووچی دولتلر» رۉیخطیگه کیریتیلگنیدن کېین یوز بېردی.
امریکا رسميلری، جملهدن تشقی ایشلر وزیری مارکو روبیو طالباننی سیاسي باسیم و امتیاز آلیش اوچون آدملرنی حبسگه آلیشده عیبلهگن اېدی.
شونگه قرهمهی، طالبان ایلگری هم مذاکرهلر دایرهسیده بیر قطار امریکا وطنداشینی آزاد قیلگن.
