بعضیده اۉزیمنی ژورنالیست صفتیده اېمس بلکه بیر سیاستچی صفتیده افغانستان سیاست میدانیده قۉییب تحلیل قیلگنیمده، طالبان بیلن انیق ایکّی نقطهده دشمنلیکده بۉلیب تورگنیمنی کۉرهمن؛ بیرینچی طالباننینگ افراطی مذهبی توشینچهسی و ایکّینچی طالباننینگ حددن تشقری متعصب و قومگرالیک توشینچهسی دیر. بو ایکّی مسالهنی انیق کۉرگنده طالبان مذهبی افراطیلیگی قنچهلیک جدّی و خوفلی اېکنینی بوتون دنیا بیلهدی و بو اوچون حتا که اۉزلرینی هم جمعیت ایچیگه کېلیب انتحار قیلیب، همه جاینی قانگه بیلهیدی لېکن طالبان آلدیده انهشوو مذهبی افراطیلیکدن کۉره هم افغانناسیونالیزمی یا -ده پشتونوالی اساسیده بۉلگن قومی افراطیت کوچلیراق چونکه طالبان بیرینچی بۉلگن مذهبی افراطیتنی هم قومی توشینچهلرنی عملگه آشیریش اوچون تَنلهگن و بو اېسه بیزنینگ خلقنی نشانگه توتگن.
شوندهی اېکن، طالبان بیلن اگرده بیر اۉزبېک سیاستچی اولهراق مذهبی توشینچه اساسیده کېلیشیب آلیش ممکن و بو گروه ممکن کونی کېلیب، مذهبی افراطیتیگه اۉزگریش کېلتیریشی ممکن و حتا که بو اۉزگریشنی دوحه بیتیمیگه هم دنیاگه وعده بېرگن اېدی لېکن طالبان هیچ قچان اۉزلرینینگ قومی تار قرهشینی اۉزگرتیرمهیدی و بو سبب اۉزبېک خلقینینگ اساسی دشمنی شو توشینچه دیر و بو توشینچه اساسیده طالبان و افغان ناسیونالیزمی سیزنینگ هر بیر حقخواهلیگینگیز برابریده رد جواب و بو دادخواهلیک تورلی یۉللر بیلن باستیریشگه اورینهدی.
بو ساحهده طالبان و افغان ناسیونالیزمی پوپولیستیک و عادی اهالینی عقل و ادراکنی دینی و ملیگرالیک توشینچهلری بیلن باستیریشگه اورینهدی و بونگه مثال کۉریب کېلهیمیز که بیز خلق قچان که حق سۉرهب و مدنیتگه حرمت طلب قیلسه طالبان اۉزینینگ پوپولیستیک و عقل و ادراکنی باشقیریش اوچون استراتیژیسینی ایشگه توشیرهدی. مثال اوچون بیز قچان که نوایی هیکلی دېب سېس چیقاردیک یا ده اۉزبېک کلاهسی دېب، طالبان و افغان ناسیونالیزمینینگ دینی و ملیگرالیک توشینچهسی بیلن دوچ کېلدیک. بیزنینگ خلقیمیز باستیریش اوچون بۉلگن بو سیاست و یاندهشوو جوابی بیزگه شو اېدی: «عادی مسالهلر دېب مسلمانلر ایچیده نفاق تشلهمنگ» و «وطن نیمه حالده دیر سیزلر کېلیب بیر کلاهگه بند بۉلیب قالگنسیزلر» بو اجتماعی صحیفهلرده هر بیر افغان ناسیونالیزمی خذمتچیسی و بو گروهنینگ پوپولیستیک تبلیغاتیگه الدهنگن کیشی تامانیدن یازیلدی و ایشانهمن که هر بیرینگیز بونگه دوچ کېلدینگیز.
طالبان بو مسالهنی اۉرتهگه تشلش اوچون کۉپینچه اۉزیمیزدن بۉلگن پوپولیستیک دینی و ملیگرالیک شعارلریگه الدهنگن کیشیلرنی اۉرتهگه تشلهیدی و بونگه مثال فاریاب بیلیم یورتی تامانیدن «قیزیل تاقّی منظوریلردن و اۉزبېکلردن اېمس» دېگن بیاناتنی یازیشی دیر. اویلب کۉرینگ افغانستانده اۉنلب بیلیم یورت بار نیمه اوچون واقعه خصوصیده فاریاب بیلیم یورتی کېلیب مناسبت بیلدیرهدی؟ بو اېسه طالبان و افغان ناسیونالیزمینینگ یخشی بیلیب اۉینهب تورگن سیاستی دیر و بو سیاست اساسیده، خلقنینگ دعوالرینی اۉز ایچیدن باستیریش و ناحقلیککه چیقریشگه اورینهدی طالبان و پشتونوالی توشینچهده بو خصوصده قندهار یا ننگرهار بیلیم یورتی بیاناتیدن کۉره فاریاب بیلیم یورتی آدرسیدن چیقریلگن گپ تاثیرلی دیر. شوندهی قیلیب، اولر اۉزبېکلرنینگ کلاهسینی منظور پشتین یا که پشتونوالی حرکتگه بېریب قۉییشیگه حرکت قیلهدیلر.
شوندهی اېکن که بیز طالبان بیلن قرشیلیکده اېکنمیز بیز هم کېلهجکده هر بیر اۉزگریشگه طالبان قرشیمیزده بۉلگن هر بیر سیاسی حرکتده حتا که مجبور بۉلیب طالبان بیلن بیر حکومتگه موافقت بۉلینگن حالده، اولرنینگ دینی و ملیگرالیک شعارلریگه تېزلیک بیلن ایریب کېتیب، تسلیم بۉلهدیگن سیاستچیلرنی میدانگه یوباریشیمیز کېرهک اېمس بلکه ناحق بۉلسه هم اۉز خلقیمیز و مدنیتیمیز اوچون کوچلی تورهدیگن آدملرنی جۉنهتیشیمیز کېرهک شوندهی آدملر که طالبان دیک گروهلر و افغان ناسیونالیزمی قرآن قۉلیده قسم ایچیب کېلگنده هم مدنیتیمیز و خلقیمیزگه عاید موضوعلرده اولرنینگ گپینی قبول قیلمسلیک لازم.
