بیرلشگن ملتلر تشکیلاتینینگ افغانستاندهگی یاردم ادارهسی (یوناما) «اخبارات و علاقه تکنالوژيلریده قیزلر کونی» مناسبتی بیلن ینه بیر بار طالباندن افغانستانده قیزلر تعلیمیگه قۉییلگن تعقیقنی امکان قدَر تېزراق بېکار قیلیشنی سۉردی.
یونامانینگ تأکیدلشیچه، قیزلر تعلیمیگه قۉییلگن تعقیق جاري اېتیلگنیگه تۉرت یریم ییل بۉلگنیگه قرهمهی، افغانستاندهگی بوتون بیر اولاد قیزلر تعلیمدن محروم قالگن.
بیرلشگن ملتلر تشکیلاتینینگ اوشبو ادارهسینینگ قۉشیمچه قیلیشیچه، «تعلیمگه، جملهدن اخبارات و علاقه تکنالوژيلری ساحهسیده تۉلیق و تېنگ اېریشیش برچه قیزلر اوچون نهفقط اساسي انسان حقوقی، بلکه اقتصادي ترقیات، برقرار ایش اۉرینلرینی یرهتیش و افغانستان اوچون اۉزیگه تهیهنهدیگن کېلهجکنی قوریش نینگ مهم اوستونلریدن بیری دیر.»
اوشبو ادارهنینگ تأکیدلشیچه، قیزلر تعلیمیگه سرمایه کیریتیش اصلیده ملي خوفسیزلیک، اجتماعي برقرارلیک و اقتصادي اۉسیشگه تۉغریدن-تۉغری سرمایه کیریتیش دېمک دیر.
طالبان افغانستانده قَیته حاکمیتنی قۉلگه آلگچ، قیزلرنینگ آلتینچی صنفدن یوقاری تعلیمینی نامعلوم مدتگه تعقیقلهدی.
شوندن سۉنگ اولر بیلیم یورتلری و طبیات انستیتوتلرینی هم عیاللر و قیزلر اوچون یاپدی و اولرنی اۉرته همده عالي رسمي تعلیمدن تۉلیق محروم قیلدی.
بوندن تشقری، طالبان عیاللرنینگ ایشلشینی هم تعقیقلب، اولرنینگ جمعیتدهگی اشتراکیگه قطعي چېکلاولر جاري اېتگن.
