طالبلرنینگ ترانسپورت و هوا یۉللر وزیرلیگی «شهر ترانسپورت خدمتلرینی ترتیبگه سالیش و یېنگیللشتیریش مقصدیده» کابل شهریدهگی۱۶ ته ترانسپورت یۉنهلیشیده «تونس» روسومیدهگی موترلر همده «شخصي رقملی» موترلرنینگ قتناوی تۉختهتیلگنینی معلوم قیلدی.
مذکور وزیرلیک بوگون (شنبه، ۱۹ثور) بیانات نشر قیلیب، اوشبو یۉنهلیشلر «دشتی برچی، میروس میدان، چهاراهی قمبر، پول سوخته، پوهنتون» و باشقه بیر قطار یۉنهلیشلرنی اۉز ایچیگه آلیشینی بیلدیردی.
طالبلرنینگ ترانسپورت و هوا یۉللر وزیرلیگی معلوماتیگه کۉره، اېندیلیکده اوشبو یۉنهلیشلرده اهالیگه «بس، تکسی و مرسدس» روسومیدهگی ترانسپورت واسطهلری خدمت کۉرستماقده.
کابل نینگ غربي قِسمیدهگی اهالی تخمیناً ایکّی هفتهدن بویان دشتی برچی یۉنهلیشلریده «تونس» روسومیدهگی موترلر قتناوی تۉختهتیلگنی و بو حالت آدملر اوچون کېنگ کۉلملی معمالرنی یوزهگه کېلتیرگنینی اَیتماقده.
اَیریم تصدیقلنمهگن خبرلرگه کۉره، دشتی برچی یۉنهلیشلریده تخمیناً۱۲۰۰ ته «تونس» روسومیدهگی موتر فعالیت یوریتگن. اوشبو ترانسپورت واسطهلری فعالیتی تۉختهتیلیشی نتیجهسیده مینگلب عایلهلر درآمد منبعی و تیریکچیلیک واسطهسیدن اَیریلگن.
کابلنینگ غربیده جایلشگن دشتی برچی حدودی افغانستان پایتختینینگ اېنگ گوجوم حدودلریدن بیری حسابلنهدی. «تونس» روسومیدهگی موتر هیداوچیلری اېسه ییللر دوامیده اوشبو منطقهنینگ اساسي و ایچکی یۉللریده اهالیگه ترانسپورت خدمتلری کۉرسهتیب کېلهیاتگن اېدی.
منو
