صدیقه ناملی طالبان قماقخانهسیده سقلنیب کېلهیاتگن بیر قیز بالهنینگ آنهسیدن اۉزبېک تیوی اختیاریده قرار تاپکن ویدیو بیاناتده، بو آنه قماقده بۉلگن بالهسی اوچون عدالت سۉرهیدی.
بادغیس ولایتی بالامرغاب اولسواللیگینینگ «موریچاق» قیشلاغی یشاوچیسی بۉلگن صدیقه ناملی قیز باله ۱۲ یاشیده طالبان تامانیدن قماققه تارتیلگن.
ایتیلیشیچه، بوندن بېش ییل آلدین، طالبان بو قیزنی، پشتون خلقیگه منسوب و طالبان بیلن علاقهدار «خداینظر» ناملی بیر قرری یاشلی آدمگه تورموشگه چیقیشگه راضی بۉلمهگنی سبب، زندان قیلگن.
صدیقهنینگ آنهسی بېش ییل دوامیده طالباننینگ تورلی ادارهلری جملهدن بو گروه رهبری ادارهسیگچه عریضه یازگنلری بیراق جواب بېرمهگنینی ایتهدی.
صدیقهنینگ آنهسی شونینگدېک، قیزی ۱۲ یاشیدن ۱۷ یاشیگچه عمرینی طالبان قماقخانهسیده اۉتکزگنینی تیلگه آلیب، اونینگ ساغلیق احوالی آغیر اېکنینی بیلدیرهدی.
ایتیلیشیچه، خداینظر ناملی شخص طالبان ایچیدهگی نفوذی سبب بو قیز قماققه تارتیلیشی اوچون شرایط یرهتگن.
شونینگدېک، بوندن ایکّی ییل آلدین «ارباب حامد» ناملی شخص بو قیزدن حمایه قیلگندن سونگ سِرلی طرزده اۉلدیریلگن.
