یونیسف افغانستانده آزیق-آوقت تنقیصلیگی و آزیب کېتیش موسمی نینگ اېنگ آغیر دوری یقینلشر اېکن، 3،7 میلیون باله نینگ تۉییب آوقتلنمسلیک خوفی آستیده قالهیاتگنینی بیلدیریب، زودلیک بیلن چارهلر کۉریش و سرمایه کیریتیشگه چقیردی.
یونیسف یکشنبه کونی (۲۱-سرطان) نشر قیلگن بیاناتیده افغانستان نینگ۳۴ ولایتیدن۲۶ تهسیده بېش یاشگچه بۉلگن بالهلر آرهسیده آزیب کېتیش حالتی اۉتگن ییلگه نسبتاً یامانلشگنینی معلوم قیلدی.
تشکیلاتنینگ تأکیدلشیچه، بالهلر اۉرتهسیدهگی آزیق-آوقت و طعاملنیش خوفسیزلیگی نینگ یامانلشووی افغانستاندهگی۳.۷میلیون بېش یاشگچه بۉلگن بالهنی تۉییب آوقتلنمسلیک خوفی آستیگه قۉیهیاتگن اساسي عامللردن بیریدیر.
یونیسف بالهلرنینگ آزیقلنیشینی حمایه قیلیش و حیات اوچون خوفلی آزیب کېتیش نینگ آلدینی آلیش مقصدیده اېرته چارهلر کۉریش اوچون زودلیک بیلن مبلغ اجرهتیلیشی ضرورلیگینی تأکیدلهدی.
تشکیلات نینگ ینگی گزارشیده عایلهلرده آزیق-آوقت خیلمه-خیللیگی نینگ کمهییشی، طعاملنیش سانینینگ قیسقریشی، بالهلرنینگ احتیاجیدن کم طعاملنیشی و آچ قالیشی کبی آگاهلنتیرووچی بېلگیلر قید اېتیلگن.
گزارشگه کۉره، افغانستانده تۉییب آوقتلنمسلیک خوفی آستیدهگی میلیونلب بالهلر جوده کم و جوده کېچ طعاملنماقده.
بو آگاهلنتیریش مملکت جولای-سپتمبر آیلرینی اۉز ایچیگه آلگن آزیب کېتیش موسمی نینگ اېنگ آغیر باسقیچیگه کیرهیاتگن بیر پیتده نشر قیلیندی. آزیب کېتیش اۉتکیر و حیات اوچون خوف توغدیرووچی تۉییب طعاملنمسلیک توری بۉلیب، عادتده آزیق-آوقت یېتیشماوچیلیگی، کسللیک یاکه هر ایکّیسی طفیلی یوزهگه کېلهدی.
گزارشده قید اېتیلیشیچه، آزیق-طعام تنقیصلیگی آغیر بۉلگن عایلهلردهگی بالهلر آزیب کېتیشدن آلتی برابر کۉپراق اذیت چېکماقده.
یونیسف نینگ افغانستاندهگی نمایندهسی تاجالدین اویواله شوندهی دېدی: «افغانستاندهگی کیچیک یاشدهگی بالهلر اېنگ آغیر موسم باشلنیشیدن آلدین هم تۉییب طعاملنمسلیک حالتیگه تاباره یقینلشماقده.»
اونینگ سۉزلریگه کۉره، ینگی دلیللر بالهلر آغیر تۉییب طعاملنمسلیک حالتیگه توشیب قالیشیدن آلدین چارهلر کۉریش امکانینی بېرماقده. عایلهلر طعاملنیش سانینی کمهیتیره باشلشی یاکه تۉییملی محصولاتلرنی استعمال قیلیشنی تۉختهتیشی باله نینگ تېز آرهده خوفلی درجهده آزیب کېتیشی ممکنلیگیدن درَک بېرهدی.
اویواله دوالش حیاتنی سقلب قالیشینی، بیراق بونینگ بیلن بیرگه کیچیک یاشدهگی بالهلر و حاملهدار عیاللر نینگ تۉغری طعاملنیشینی تأمینلش آرقهلی پرافیلهکتیکهگه هم سرمایه کیریتیش ضرورلیگینی تأکیدلهدی.
یونیسف گزارشیده بالهلرنینگ ناتۉغری طعاملنیشی و آزیق-آوقت خوفسیزلیگی نینگ یامانلشیشیدن تشقری، تۉییب طعاملنمسلیک نینگ کوچهییشیگه کسللیکلر ترقهلیشی، اېملش قمراوی نینگ پستلیگی، سوو خدمتلری نینگ یېترلی اېمسلیگی همده مالیهلشتیریشدهگی کمچیلیکلر سبب بۉلهیاتگنی قید اېتیلگن.
تشکیلات بو عامللر بیرگهلیکده بالهلرنینگ آزیب کېتیشگه مایللیگینی کوچهیتیرهیاتگنینی و طعاملنیش، ساغلیقنی سقلش، سوو، تعلیم همده اجتماعي حمایه ساحهلریده موافقلشتیریلگن چارهلر ضرورلیگینی تأکیدلهدی.
یونیسف آزیب کېتیش موسمی نینگ اېنگ آغیر دوری یقینلشهیاتگنی سری وضعیتنی جلولش امکانیتی تاباره کمهییب بارهیاتگنیدن آگاهلنتیردی.
تشکیلات افغانستاندهگی فعالیتنی دوام اېتتیریش اوچون شاشیلینچ و ماسلشووچن مالیهلشتیریش اجرهتیلیشینی سۉردی. بو یاردم آزیق-طعام تنقیصلیگی بالهلرده حیات اوچون خوفلی تۉییب طعاملنمسلیککه ایلنیشیدن آلدین عایلهلرگه یېتیب باریشگه خدمت قیلیشی کېرهک.
