طالباننینگ بوتونلهی افغانستانده بۉلگن چمهسی بېش ییللیک حاکمیتی اۉتگن کېچه بدخشان ولایتی یفتل اولسواللیگی بیر نیچه ساعت قولهشی بیلن کتّه بیر شوککه دوچ کېلدی.
اوشبو اولسواللیک اۉزلرینی «وطن سپاهیلری» دېب تانیشتیرگن گروه آرقهلی کوتیلمهگن حالده اویوشتیریلگن هجوم بیلن سقوط قیلیب، بو گروه اولسواللیک خوفسیزلیک قومندانلیگینی قۉلگه آلدی و گروه جنگچیلری بیر نیچه ساعت بیرقلرینی قومندانلیک بناسیده هیلپیرهتدیلر.
اۉزبېک تیوی بو گروه هجومیدن بیر کون اوتیشیدن سونگ، گروهنینگ ایچیدهگی بیر منبع بیلن صحبتلشیشگه موفق بۉلدی.
منبعنینگ اۉزبېک تیوی بیلن شریک قیلگن معلوماتیگه کۉره، گروه اساسا تاجیک و اۉزبېک حربیلر و فعاللر تشبثی بیلن تشکیل اېتیلگن و مقصدلری اېسه طالبانگه قرشی کورهشیش دیر.
شو بیلن بیرگه، بو منبع اۉتگن کېچه یفتل اولسوالیگیده اویوشتیریلگن هجومده بدخشاندن تشقری، باشقه ولایتلردن بۉلگن اینیقسه بیر قنچه اۉزبېک حربیلر هم اشتراک اېتگنینی معلوم قیلهدی.
منبع شونینگدېک، هجومنی اویوشتیرگن حربیلردن هیچ بیری طالبان قۉلیده توشمهگنینی تاکیدلب، طالبانگه قرشی حربی حرکتلری دوامیدن هم ایتهدی.
