بدخشان ولایتیده طالبان و بو گروهنینگ ناراض قومندانلریدن بۉلگن جمعه خان فاتح عسکرلری اۉرتهسیده دوام اېتر اېکن، جمعه خان فاتح اۉز عسکرلریگه هجوم قیلیش اوچون فرمان بېرگنی ایتیلهدی.
جمعه خان فاتحگه تېگیشلی ادعا اېتیلگن سېسلی بیاناتده، طالباننینگ بو ناراض قوماندانی اوروش باشلنگنینی تصدیقلب، عسکرلریگه طالبانگه قرشی هجوم قیلیشینی بویورهدی.
فاتحگه تېگیشلی اېکنی ایتیلگن اوشبو سېسلی بیانات اجتماعی ترماقلرده کېنگ ترقهلیب، بدخشانده اوروش جدّیلشگنی معلوم قیلینماقده.
شو بیلن بیرگه، بدخشان ولایتی نسی اولسواللیگیدهگی تۉقنهشوولرگه عاید بیر قنچه ویدیولر هم ترقهلگن که اوشبو ویدیولرده آتیشمهلر یوز بېرهیاتگنی کۉرینهدی.
ایریم یېتکیرمهلر اۉز منبعلری معلوماتیگه اساسلنیب نشر قیلگن خبرلریگه کۉره، حاضرگچه بو تۉقنهشوولده طالباننینگ کمیده یېتّی جنگچیسی جان بېرگن.
شونینگدېک، جمعه خان فاتحنینگ عسکرلریدن بیری هم نسی اولسواللیگیدهگی شاخدره حدودیده جان بېرگنی ایتیلهدی.
طالبان بو خبر یازیلیشیگه قدر اوشبو هجوملر و تۉقنهشوولر حقیده بیران نرسه دېمهگن.
