بیرلشگن ملتلر تشکیلاتینینگ گیاهوند مادّهلر و جنایتچیلیک بۉییچه باشقرمهسی جاپان حکومتی افغانستاندهگی ضعیف قتلم وکیللری اوچون گیاهوند مادّهلر بیلن کورهشیش صلاحیتینی کوچهیتیریشگه ۹.۴ میلیون امریکا دالری مقداریده یاردم بېریشینی معلوم قیلدی.
اوشبو باشقهرمه معلوم قیلیشیچه، بو بارهدهگی کېلیشوو بوگون (پنجشنبه، ۱۲سنبله) اونادc نینگ افغانستاندهگی وکیلی پولیک اوک سیری و جاپانلیکيه نینگ افغانستاندهگی اېلچیسی کنیچی ماساموتو اشتراکیده امضالنگن.
تشکیلاتنینگ بیاناتیگه کۉره، مذکور یاردم جاپان خلقارا همکارلیک اگېنتلیگی(جایکا) آرقهلی «ضعیف قتلم وکیللرینینگ گیاهوند مادّهلر بیلن کورهشیش صلاحیتینی کوچهیتیریش» ناملی ایکّی ییللیک دستور دایرهسیده عملگه آشیریلهدی.
تشکیلات نینگ بیلدیریشیچه، اوشبو دستور افغانستاندهگی گیاهوند مادّهلر بیلن باغلیق وضعیت عاقبتیده اقتصادي معمالر و اجتماعي ضعیفلیکلرگه دوچ کېلهیاتگن ضعیف جماعهلرنی قۉللب-قوّتلش مقصدیده یۉلگه قۉییلگن. دستور جاري ییل سپتمبریدن ۲۰۲۸-ییل سپتمبریگچه بدخشان، بادغیس، هلمند، قندهار و تخار ولایتلریده عملگه آشیریلهدی.
بیاناتده ایتیلیشیچه، دستور برقرار مقابل تیریکچیلیک منبعلرینی رواجلنتیریش آرقهلی ایلگری کۉکناری یېتیشتیریشدن درآمد آلگن ضعیف قیشلاق اهالیسی فراوانلیگی و برقرارلیگینی یخشیلشگه قرهتیلگن.
شونینگدېک، لایحه گیاهوند مادّهلرنی استعمال قیلیش بیلن باغلیق بوزیلیشلردن اذیت چېکهیاتگن یاکه بوندهی خوف آستیده بۉلگن انسانلرنی گیاهوند مادّهلرنی استعمال قیلیشنینگ آلدینی آلیش و دوالش بۉییچه علمي اساسلنگن خدمتلرنی کېنگهیتیریش آرقهلی قۉللب-قوّتلهیدی.
تشکیلاتنینگ معلوم قیلیشیچه، لایحه دایرهسیده ایلگری کۉکناری یېتیشتیریش بیلن شغللنگن قریب۸ مینگ عایله، یعنی ۵۶مینگگه یقین کیشی مقابل تیریکچیلیک دستورلری بیلن قمرهب آلینیشی کوتیلماقده. شونینگدېک، گیاهوند مادّهلرنی استعمال قیلیش خوفی آستیدهگی یاکه اوندن کېلیب چیقهدیگن بوزیلیشلرگه دوچ کېلگن قریب ۲۵ مینگ کیشی پیشگرلیک، دوالش، توانبخش و جمعیتگه قَیته انتیگراسیون دستورلریدن فایدهلنیشی کوتیلماقده.
جاپاننینگ افغانستاندهگی اېلچیسی کینجی ماساموتو شوندهی دېدی: «گیاهوند مادّهلر بیلن کورهشیش افغانستان و خلقارا همجعميت عمومي منفعت و مسوولیتلرگه اېگه بۉلگن ساحهدیر. برقرار ترقیات افغانلرنینگ اېگهلیک قیلیشی و خلقارا همکارلیک نینگ کانتروکتیف اشتراکیده قۉللب-قوّتلنیشیگه باغلیق. شو نقطهٔ نظردن، همکارلیک و ایشانچنی مستحکملش اوچون مهم پلاتفورم بۉلیب خدمت قیلهیاتگن دوحه جریانی دایرهسیدهگی ملاقاتلرنینگ دوام اېتیشینی آلقیشلهیمن».
جاپان خلقارا همکارلیک اگېنتلیگی نینگ افغانستاندهگی وکیلی سوتا توساگا هم شوندهی دېدی: «بیز گیاهوند مادّهلر بیلن کورهشیش صلاحیتینی کوچهیتیریش نهفقط افغانستان نینگ کېلهجکدهگی برقرارلیگی و ترقیاتی اوچون ضرور، بلکه منطقوي همکارلیکنی رواجلنتیریش و جماعهلر فراوانلیگینی یخشیلشده هم مهم رۉل اۉینهیدی، دېب حسابلهیمیز».
تشکیلاتنینگ افغانستاندهگی وکیلی آقای پولیک اوک سیری اېسه لایحه مقابل تیریکچیلیک، گیاهوند مادّهلرنی استعمال قیلیش نینگ آلدینی آلیش، دوالش و خلقارا همکارلیکنی بیرلشتیریش آرقهلی ساغلامراق، خوفسیزراق و برقرارراق جمعیتلرنی شکللنتیریشگه خدمت قیلهدیگن عملي و برقرار یېچیملرنی ایلگری سوریشینی ایتدی.
جاپان طالبان افغانستانده حاکمیتنی قَیته اېگهلهگنیدن کېین مملکتگه یاردم بېرهیاتگن اساسي دونر دولتلردن بیری بۉلیب کېلماقده. جاپان حکومتی نینگ افغانستانگه یاردملری اساسن بیرلشگن ملتلر تشکیلاتلری آرقهلی گیاهوند مادّهلر بیلن کورهشیش، کیچیک بیزنسلرنی قۉللب-قوّتلش، تۉییب طعاملنمسلیککه قرشی کورهشیش و بالهلر تعلیمینی قۉللب-قوّتلش یۉنهلیشلریده عملگه آشیریلماقده.
