بیرلشگن ملتلر تشکیلاتینینگ انسانپرورلیک یاردملرینی موافقلشتیریش اداره (اوچا) یاردملرنی تقسیملشدهگی چېکلاولر حقیدهگی گزارشده چېکلاولرنینگ اساسي قِسمی طالبلرنینگ انسانپرورلیک یاردم کۉرسهتیش جریانیگه ارهلشووی بیلن باغلیق اېکنینی معلوم قیلدی.
اوچا گزارشیده قید اېتیلیشیچه، ۲۰۲۶-ییل جولای آییده افغانستان بۉیلب انسانپرولیک تشکیلاتلر یاردم یېتکزیش امکانیتی بیلن باغلیق ۳۰ ته حالتنی قید اېتگن. بو کۉرستکیچ جون آییده قید اېتیلگن ۶۰ ته حالتگه نسبتاً ۵۰ فایزگه کمدیر.
گزارش کۉره، انسانپرورلیک فعالیتلرنی عملگه آشیریشگه ارهلشیش یاردم یېتکزیشدهگی اېنگ کۉپ اوچرهیدیگن چېکلاو بۉلیب، جولای آییده بوندهی ۱۶ ته حالت قید اېتیلگن. آچه معلوماتلریگه کۉره، بوندهی حالتلرنینگ اېنگ کۉپی مملکتنینگ جَنوبي منطقهسیده، اوندن کېین اېسه غربي حدودیده قید اېتیلگن.
انسانپرورلیک فعالیتگه ارهلشیش بیلن باغلیق ۱۶ ته حالتدن تۉرتتهسی همکارلیک شرطنامهلرینی امضالشدهگی کېچیکیش یاکه معمالر، اوچتهسی یاردم آلووچیلرنی تنلش جریانیگه ارهلشیش و ینه اوچتهسی دستورلرنی عملگه آشیریشگه ارهلشیش بیلن باغلیق بۉلگن.
اوچا معلوماتیگه کۉره، ایکّی حالتده طالبلر تشکیلاتلردن خادملر رۉیخطی و باشقه مخفي معلوماتلرنی طلب قیلگن.
خادملرنی ایشگه آلیش جریانیگه ارهلشیش، عیال خادملرگه محرم همراه بۉلیشینی طلب قیلیش، انسانپرورلیک تشکیلاتلرده ایشلاوچی عیاللرنینگ فعالیتدهگی اشتراکینی چېکلش همده اهالینینگ یاردم آلیش جایلریگه کیریشیگه تۉسقینلیک قیلیش هم طالبلرنینگ ارهلشووی صفتیده قید اېتیلگن.
اوچانینگ معلوم قیلیشیچه، جولای آییده انسانپرورلیک خادملر، یاردم تشکیلاتلرینینگ مال-ملکی یاکه تاسیساتلریگه نسبتاً زۉرآورلیک بیلن باغلیق ۱۲ته حالت هم قید اېتیلگن. اولر آرهسیده انسانپرورلیک خادملرنینگ ایکّی مرته حبسگه آلینیشی، یاردم خادملریگه ایکّی مرته جسماني تجاوز، تهدید بیلن باغلیق ایکّی حالت، کيینیش طلبلرینی بجریشگه مجبورلش بیلن باغلیق اوچ حالت و انسانپرورلیک تشکیلاتلرده ایشلاوچی عیاللرنینگ اشتراکینی چېکلش بیلن باغلیق ایکّی حالت بار.
اوچا معلوماتیگه کۉره، گزارش دوریده طالبان هرات ولایتیده قوریلیش ایشلری وقتینچه توختهتیلگن پیتده قبول مرکزیدهگی بیر قوریلیش رهبری، بیر قۉریقچی و بېش ایشچینی حبسگه آلگن.
اوچانینگ بیلدیریشیچه، حبسگه آلینگنلرنینگ اکثریتی کېینچهلیک آزاد قیلینگن، بیراق قوریلیش رهبری ۲۸-جولایگچه حبسده قالگن.
علیحده بیر حالتده اېسه هراتده ایکّی نفر انسان پرور یاردم تشکیلات خادیمی حبسگه آلینگن. اوشبو حالتلر، شونینگدېک، تهدید و جسماني هجوملر حقیدهگی خبرلر گومانیتار خادملرنینگ خوفسیزلیگی یوزهسیدن خواطرلرنی کوچهیتیرماقده.
اوچانینگ قید اېتیشیچه، بو چېکلاولر سېزیلرلی عاقبتلرگه آلیب کېلگن.
گزارشگه کۉره، ۱۸ ته حالت گومانیتار دستورلرنینگ وقتینچه توختهتیلیشیگه، ینه ایکّی حالت اېسه تاسیساتلرنینگ وقتینچه یاپیلیشیگه سبب بۉلگن.
