افغانستان خبرچیلر مرکزی طالبلرنینگ امر به معروف و نهي از منکر خادملری خوست ولایتیده ۱۲کیشی خبرچینی وقتینچه حبسگه آلیب، اولرنینگ کمرهلرینی مصادره قیلگنینی معلوم قیلدی.
مذکور مرکز ایکسدهگی پیامیده محلي منبعگه تهیهنیب، خبرچیلر بوگون (سهشنبه، ۱۷-سنبله) کتاب کۉرگزمهسینی یاریتیش وقتیده خوست شهری نینگ ۲-ناحیهسیدن حبسگه آلینگنی و کمرهلرینینگ مصادره قیلینیشی آرتیدن آزاد اېتیلگنینی یازگن.
محلي ژورنالیست اوشبو تشکیلاتگه خبرچیلر کۉرگزمهنی یاریتیش اوچون طالبلرنینگ خوستدهگی اخبارات و مدنیت باشقرمهسی تکلیفیگه بناءً بارگنینی، بیراق طالبلرنینگ امر به معروف خادملری بو تکلیفنی اعتبارسیز قالدیریب، ژورنالیستلرنی «کمسیتووچی مناسبت» بیلن حبسگه آلگنینی ایتگن.
اونینگ بیلدیریشیچه، خوست ولایتی والی ادارهسی و طالبلرنینگ باشقه محلي منصبدارلری واقعهدن خبردار قیلینگن، بیراق قریب تۉرت ساعت اۉتگنیگه قرهمهی، خبرچیلرنینگ کامرهلری حلی قَیتریلمهگن.
افغانستان ژورنالیستلر مرکزی بو حرکت تیریک موجوداتلر تصویرینی ترقهتیشنی تعقیقلش دایرهسیده عملگه آشیریلگنینی یازگن. گرچه بو تعقیق خوستده رسماً اعلان قیلینمهگن بۉلسه-ده، محلي ژورنالیستلر و ییتکرمه نمایندهلری اونی عملگه آشیریش اوچون بیر نېچه بار نارسمي باسیمگه اوچرهگن.
افغانستان ژورنالیستلر مرکزی «طالبان حکومتینینگ خوستدهگی امر به معروف و نهي از منکر ادارهسی تامانیدن ژورنالیستلرگه نسبتاً کمسیتووچی، انساني قدر-قیمت و کسبي معیارلرگه ضد مناسبت»نی کېسکین قارهلهگن.
مرکز طالباندن ژورنالیستلرنینگ کمرهلرینی زودلیک بیلن قَیتریش، «بوندهی یامان مناسبت و حرمتسیزلیککه برهم بېریش همده ژورنالیستلرگه حبسگه آلینیشی یاکه قۉرقیتیلیشیدن خالی محیطده اۉز کسبي فعالیتینی اېرکین آلیب باریشیگه امکان بېریش»نی سۉرهگن.
طالبلر اۉزی نینگ امر به معروف و نهي از منکر قانونیده تیریک موجوداتلر تصویرینی ترقهتیشنی تعقیقلهگن. اوشبو کۉرسهتمه حاضرگچه افغانستاننینگ ۲۵ ولایتیده عملگه کیریتیلگن.
