طالبلرنینگ کانلر و پترولیم وزیرلیگی مملکتنینگ جَنوبي، غربي و جَنوبی-شرقي حدودلریده جیولوگیک خریطهلش ایشلری باشلنگنینی معلوم قیلدی.
اوشبو وزیرلیک بوگون (شنبه، ۲۱سنبله) نشر قیلگن بیاناتیده خریطهلش ایشلری «یوز مینگدن بیر» مقیاسده عملگه آشیریلیشینی بیلدیرگن.
کانلر و پترولیم وزیرلیگینینگ «فایدهلی قزیلمهلرنی جیولوگیک تدقیق قیلیش و قیدیریش باش ادارهسی» بېش ییللیک دستور دایرهسیده اوشبو خریطهلش ایشلرینی آلیب بارماقده.
بیاناتده ایتیلیشیچه، جیولوگیک تدقیقات و خریطهلش نینگ عملي ایشلری پکتیکا ولایتیدن باشلنگن. لایحه دوامیده «جیولوگیک توزیلمهلر، یېر رېلیېفی خصوصیتلری همده مینرال ذخیرهلرگه اېگه بۉلیش صلاحیتی موجود حدودلر» تخنیکي و اختصاصلشتیریلگن اصوللر یاردمیده تحلیل و اۉرگنیلهدی.
مینرال مادّهلر موجود حدودلرنی مینیراللشوو کوزهتیلمهیدیگن حدودلردن اجرهتیب آلگچ، اوشبو مینرال حدودلرنینگ اقتصادي صلاحیتینی بهالش اوچون ینهده انیق و اختصاصلشتیریلگن قیدیروو همده تدقیقات ایشلری باشلنیشی رېجهلشتیریلگن.
طالبان سۉنگگی بېش ییل دوامیده مملکت نینگ شمالي، شِمالی-شرقي و مرکزي حدودلریده انیقلنگن مینرال منبعلرنی قزیب آلیشنی یۉلگه قۉیگن.
طالبلر مخالفلری اوشبو گروه نینگ مینرال منبعلرنی قزیب آلیشینی مملکت کانلرینینگ «تالان-تاراج قیلینیشی» دېب اتهب، بو ایش خلق اوچون هېچ قندهی فایده کېلتیرمهیاتگنینی ایتهدی. اولرنینگ تأکیدلشیچه، طبيعي منبعلرنی قزیب آلیشدن توشهدیگن درآمدلر طالبان نینگ شخصي خرجتلریگه صرفلنهدی، فقرالر اېسه هېچ قندهی کمک آلمهگن حالده قزیب آلیش جریانیدهگی ویرانکار فعالیتلر عاقبتیده یوزهگه کېلهدیگن محیطزیستی معمالر بیلن یوزمه-یوز قالماقده.
