آلمان حکومتی تورلی جنایتلرده عیبلنیب، محکمه قیلینگن ۱۳ کیشی افغانستان وطنداشینی کابلگه دېپورت قیلدی.
آلماننینگ «انتیوی» ترماغی خبریگه کۉره، بو شخصلر سهشنبه کونی (۲۴-سنبله) چارتر آرقهلی کابلگه آلیب کېتیلگن.
اوشبو ییتکرمه آلمان فدرال ایچکی ایشلر وزیرلیگیگه تهیهنیب خبر بېریشیچه، اولرنینگ برچهسی اېرککلر بۉلیب، ایلگری جنسي جنایتلر، جسماني زۉراورلیک و گیاهوند مادّهلر سوداسی اوچون سودلنگن.
آلمان حکومتی ۲۰۲۴-ییلدن افغانستانگه دېپورتلرنی باشلهگن و طالبلر گروهی بیلن رسمي علاقهلر اۉرنهتیلگچ، دېپورتيهلرنی کۉپهیتیرگن. اوشبو علاقهلر نتیجهسیده طالبلرنینگ ایکّی دیپلوماتی آلماننینگ برلیندهگی افغانستان اېلچیخانهسی و بن شهریدهگی کانسوللیگیده قبول قیلینگن.
حاضرگچه ۲۶۳نفر مهاجر دېپورت قیلینگن بۉلیب، اولرنینگ مطلق اکثریتینی جنسي جنایتلر، قاتللیک، زۉراورلیک و گیاهوند مادّهلر بیلن باغلیق جنایتلرده سودلنگن شخصلر تشکیل اېتهدی.
آلماندهگی مهاجرلرنی قۉللب-قوّتلاوچی تشکیلاتلردن بیرینینگ ایتیشیچه، ۲۰۲۵-ییل آخریگه کېلیب، آلمانده قریب ۱۳مینگ نفر افغانستان وطنداشی مملکتنی ترک اېتیشی مجبوري بۉلگن حالده یشهگن. اولرنینگ قریب ۱۰ مینگ نفری «دولدونگ»، یعنی «وقتینچه قالیشگه رخصت بېریلگن، اما دایمي یشش مقامیگه اېگه بۉلمهگن» مقامیده بۉلگن.
بو شونی انگلهتهدیکی، حاضرچه اولرنی دېپورت قیلیش امکانیتی موجود اېمس، بیراق اولر قانوننی بوزسه یاکه آلمان حدودیدن چیقیب کېتسه، حکومت اولرنی دېپورت قیلیش حقوقیگه اېگه بۉلهدی.
