تورکیهنینگ استخبارات باشلیغی و بو مملکتنینگ مهم خوفسیزلیک سیمالریدن ابراهیم کالین، اۉتگن کون کابلگه سفر قیلیب، طالبان رسمیلریدن بیر قنچهسی بیلن اوچرهشگنیدن سونگ قیتیب کېتدی.
طالبان رسمیلری بیلن تورکیه استخبارات باشلیغی اوچرهشووی حقیده، ایکّی تامانلمه مناسبتلر، خوفسیزلیک مسالهسی و منطقه وضعیتی بحث اېتیلگن اساسی موضوعلر بۉلگنینی ترقهتیب بیلدیرماقده.
بیراق طالبان اوچرهشوولر حقیده ترقهتگن بیاناتلریده، انیق تۉختهلمهگن موضوع «بو گروه و پاکستان اۉرتهسیدهگی» جنجللر دیر که تورلی یېتکیرمهلر خبرلری و پاکستانلیک تحلیلچیلر ترقهتگن موضوعلرده، ابراهیم کالیننینگ کابلگه تارتگن موضوع، خودّی پاکستان و طالبان مسالهسی اېکنی ایتیلماقده.
شوندی اېکن اساسی موضوع بو دیر که طالبان، تورکیه طلبیگه بویسونیب، پاکستان خصوصیده قرار قبول قیلیشی ممکنمی و عکسینچه بۉلگنده بو گروه اوچون نیمه عاقبتلرنی آلیب کېلیشی ممکن؟
پاکستان و طالبان تارتیشووی
پاکستان و طالبان اۉرتهسیده تارتیشوولر بوندن آلدین، ایکّی تامان آرهسیده تۉقنهشوولر و هجوملرگه هم سبب بۉلیب، حاضرچه هم ناانیق بیر احوالده دوام اېتماقده دیر.
شو بیلن بیرگه، اوشبو تارتیشوولرنی حل قیلیش اوچون بوندن آلدین هم تورکیهگه قوشیمچه، قطر، سعودی عربستان و چین تامانیدن هم اینتیلیشلر و دیپلوماتیک حرکتلر ایلگری سوریلگن.
بیراق حاضرگچه بو حرکتلر نتیجه بېرمهی، پاکستان و طالبان اۉرتهسیدهگی کېلیشماوچیلیکلر همان ناانیقلیگیچه قالماقده. بونگه اساسی سبب اېسه پاکستاننینگ طالباندن کوتگن طلبی که بو مملکتگه قرشی قوراللی گروهلر، اینیقسه پاکستان طالبان تحریکی یا ده «تیتیپی» بیلن علاقهلر اۉزیلیب، بو گروهلرنینگ پاکستانگه قرشی تهدیدلری آلدینی آلینیشی دیر.
طالبان اېسه بو طلبگه حاضرگچه بویسونمهگن، چونکه بو گروه اۉزی بیلن قرینداش و فکرداش بۉلگن و همهدن مهمی ایچیده جایلشیب کېتگن تیتیپی بیلن قولهیلیک بیلن دشمنلیک صفیده اوتالمهیدی و بو اېسه طالبان و پاکستان ترنگلیکلری دوامیگه سبب بۉلگن.
طالبان تیتیپی مسالهسیده کېلیشووگه تیار اېمسلیگینی شوندن هم کېلیب چیقیب ایتیش ممکن که بو گروه اۉتگن کون رسمیلری و ابراهیم کالین اۉرتهسیدهگی اوچرهشوو حقیده ترقهتگن بیاناتلریده بو موضوع تۉغریسیده هیچ قندهی اشاره قیلگن اېمس.
دیمک، طالبان هلی هم تیتیپی مسالهسیده اۉزلرینی بیفرق کۉرسهتیشگه اورینماقده دیر.
اېندی کالین سفری بو ترنگلیکلرگه نقطه قۉیهمی؟
تورکیه بوندن آلدین هم پاکستان و طالبان اۉرتهسیده واسطهچیلیک قیلگن، بیراق بو حرکتلر نتیجه بېرمهگنیدن سونگ اېندی طالبان و پاکستان اۉرتهسیده واسطهچیلیک قیلمسلیککه قرار قیلگنی حقیده خبرلر ترقهلگن اېدی.
حاضر اېسه، تورکیه ینه بیربار بو موضوعگه اعتبار قرهتیشی، منطقهده دوام اېتهیاتگن وضعیت، اۉرتهگه کېلهیاتگن اۉزگریشلر و پاکستان بیلن بۉلگن تورکیهنینگ ینگی مدافعه بیتیمی سبب دېب توشینیش ممکن.
بوندن تشقری، ابراهیم کالیننینگ پاکستان مسالهسی بۉییچه کابلگه سفر قیلیشینی بوندی هم توشینیش ممکن که تورکیه بو مرته اوشبو مساله حقیده واسطهچیلیک قیلیش آرتیدن اېمس، بلکه طالبانگه بو موضوع خصوصیده لازم بۉلگن پیاملرنی یېتیشتیرگنی ممکن دیر.
شوندی بۉلگن تقدیرده، طالبان هیچ بۉلمسه حاضرده تیتیپی مسالهسی و پاکستان بیلن ترنگلیکلرنی جدّی اعتبارگه آلیشی کېرهک بۉلهدی. بۉلمهگن تقدیرده، بو گروه اۉزی بیلن یخشی مناسبتده بۉلگن و منطقهده تاثیرلی کوچگه اېگه، تورکیه مملکتینینی اۉزیدن ساووتیشی ممکن دیر.
خلاصه قیلیب ایتگنده، تورکیه استخبارات باشلیغینینگ شوندی تېزلیک بیلن کابلگه کېلیب کېتیشی کۉپینچه طالبان بیلن مذاکره قیلیش کۉرینیشیده اېمس اېدی. بوندی کېلیب کېتیش کۉپینچه خاص بیر موضوع حقیده مهم پیامنی تشیش و یېتکزیش دېب توشینیش کېرهک دیر.
بو دېگنی، طالبانگه مهم موضوع ممکن بو موضوع پاکستان بیلن جنجللر حقیده پیامنی ابراهیم کالین یېتکزگن و بو پیام اېسه طالباننی مهم تنلاو و قرار بیلن دوچ قیلیب قۉیگنی ممکن.
