کانادا پارلمانیده اۉتکزیلگن بیر ییغینده «توران تورکلری اسامبلهسی» اساسچیلریدن بۉلمیش، محمد یونس طغرا نطق سۉزلب، ایلکبار افغانستان تورکلرینینگ احوالینی، بو مملکت پارلمانی اعضالری بیلن شریک قیلدی.
جناب طغرا اۉز سۉزلریده، افغانستان ناملی مملکتده تورکلر و هزارهلر تورلی خیل باسیملر و ظلملر بیلن دوچ کېلگنینی تاکیدلب، بو خصوصده عبدالرحمن خان دوریدهگی یاندهشوولرنی اېسلهدی.
کاناداده فعال توران تورکلری اسامبلهسینینگ بو اساسچیسی، افغانستانده تورکلرگه نسبتن بۉلینگن کمسیتیشلر و مجبوری کۉچیریلیشلرنی اېسلب، شوندی عدالتسیزلیکلر برابریده جیملیک اونی چوقورلشتیریشگه یاردم بېرهدی دېب بیلدیردی.
او بو حقده شوندی دېدی: «افغانستاننینگ تورک جماعهسی وکیللری صفتیده بیز اۉز تاریخیمیز دوامیده کمسیتیش، تعقیب، مجبوری کۉچیریلیش و یۉقاتیشلرنینگ چوقور خاطرهسینی اۉزیمیز بیلن آلیب یورهمیز. بیز اۉز تجربهمیزدن بیلهمیز که بیران جماعه نشانگه آلینگنیده، باشقهلرنینگ سکوتی فقط عدالتسیزلیکنینگ ینهده چوقورلشیشیگه امکان بېرهدی.»
طغرا جنابلری اۉز نطقلریده، افغانستانده تورکلر و هزارهلرگه نسبتن آغیر باسیملر فقطگینه عبدالرحمن خان دوریده خلاصه بۉلیب قالمهی بلکه بو وضعیت تورلی ناملر آتیده بۉلگن حکومتلر و توزوملر دوریده دوام اېتیب کېلگنینی بیلدیریب، شوندی اېکن افغانستانده یالغیز حکومت توزوملری آتی اوزگریشی بیلن تینچلیک کېلمسلیگی بلکه بو اوچون بوتونلر خلقلرنینگ ارادهلری حرمت اېتیلیشینی تاکیدلدی.
افغانستانده طالباننینگ خاتین-قیزلرگه نسبتن باسیملری و چیکلاولری حقیده هم تۉختهلگن یونس طغرا جنابلری، عصرلر آلدین خاتین-قیزلر اوچون کورهشگن گوهرشاد بېگیمنینگ یورتیده، عیاللر برابریده بوندی یاندهشوولر قبول قیلینمسلیک بیر وضعیت اېکنینی بیلدیردی.
طغرا جنابلری کۉپهیتیریشیچه: «بیزنینگ تاریخیمیزگه بیر نېچه عصرلر آلدین تعلیم، علم، مدنیت و عیاللرنینگ ترقیاتینی قۉللب-قوّتلهگن گوهرشاد بېگیم کبی بویوک عیاللر هم کیرهدی. اونینگ میراثی بیزگه بو یورت تاریخی فقط اېرککلر تامانیدن یازیلمهگنینی اېسلهتهدی. عیاللر رهبر، معلم، علم-فن حاميسی، بنیادکار و تمدن رواجیگه حصه قۉشگن انسانلر بۉلگن. گوهرشاد بېگیم بوگون اۉز وطنیده عیاللر و قیزلر بیلن صادر بۉلهیاتگن واقعهلرنی کۉرگنیده دهشتگه توشگن بۉلردی.»
دیمک کاناداده هزارهلرنینگ انسانپرورلیک خدمتلر مرکزی تشبثی بیلن «بامیان بوداسی: هزارهلرنینگ آزار و باستیریلیشینینگ جیم گواهی» عنوانی آستیده اۉتکزیلگن اوشبو ییغینده، افغانستانده هزارهلرگه نسبتن سیاستلر حقیده هم مهم بحثلر بۉلدی.
بو ییغینده، نطق سۉزلهگن افغانستان تورکلری وکیلی یونس طغرا، افغانستان تورکلری هزارهلر بیلن بیردملیگینی هم تاکیدلدی.
