جنایتلرگه قرشی کوره‌ش بۉییچه خلق‌ارا محکمه‌سی، بو محکمه تامانیدن حبسگه آلینیش قراری قبول قیلینگن طالبان‌نینگ ینه ایکّی اعضاسی کیم‌لیگینی آچیقلب، بو گروه‌نینگ معارف وزیری حبیب‌الله آغا و عالی اۉقوو وزیری ندامحمد ندیم هم توتقینگه آلینیشی ضرور دېب بیلدیردی.
انسان حقلری تشکیلاتلریدن بۉلمیش «رواداری» تشکیلاتی بیر بیانات اعلام قیلیب، خلق‌ارا محکمه‌سی‌نینگ اوشبو قرارینی خوش قرشی‌لگن.
رواداری تشکیلاتی بیاناتیده، خلق‌ارا عدالتنی قۉللب-قۉتلش مقصدیده دنیا مملکتلری تامانیدن، خلق‌ارا محکمه‌سی‌نینگ اوشبو قراری جدّی اعتبارگه آلینیشی ضرورلیگی تاکیدلنگن.
رواداری تشکیلاتی شونینگدېک، طالبان‌نینگ بو ایکّی رسمیسی حبسگه آلینیشی قراری همده بوندن آلدین بو گروه‌نینگ رهبری هبت‌الله آخوندزاده و باش قاضی‌سی عبدالحکیم حقانی حبسگه آلینیشی تۉغریسیده بۉلگن حُکم، انسان حقلری بوزیلیشی قربانلری‌نینگ عدالتگه ایریشیشی اوچون مهم و تاریخی قرار اېکنینی بیلدیریلگن.
انسان حقلری بو تشکیلاتی شونینگدېک، افغانستانده انسان حقلری وضعیتیگه نسبتن سېس چیقریب بو خصوصده خوف-خطرلرنی قبول قیلیب کوره‌شگنلر فعالیتلریدن هم قدرلب، تشکیلات تشبثی بیلن اۉتکزیلگن خلق محکمه‌سی، افغانستانده انسان حقلری وضعیتی بۉییچه دنیا اعتبارینی تارتیش اوچون مهم بۉلگنینی بیلدیرگن.
بو تشکیلات شونینگدېک، افغانستانده انسان حقلری بوزیلیشی حالتلرینی حجت‌لشتیریش ایشلرینی دوام اېتتریشینی هم اورغوله‌گن.
ایتیش کېره‌ک که طالبان حاکمیتگه قیتگنیدن بیری، انسان حقلری تورلی ساحه‌لر خواطرلی بیر حالده بوزیب، مملکت خاتین-قیزلرینی اینگ عادی انسانی حقوقلریدن محرومیتده سقلب کېلماقده دیر.
