اۉزبېک تیلی ملی کونیدن نشانلش کینگ مقیاسده دوام اېتر اېکن، اېرته یک‌شنبه کونی ۲۵-نچی اکتبر، آلمان، سویس و تورکیه مملکتلری طنطنه و مهم احتفاللردن میزبانی دیر.
اوشبو احتفاللر، سویس‌نینگ زوریخ شهریده، آلمان‌نینگ هامبورگ شهریده و تورکیه‌نینگ انقره، استانبول و قونیه شهرلریده بۉلیب اۉته‌دی.
اۉزبېک تی‌وی معلوماتی اساسیده، اېرته یک‌شنبه کونی، آلمان‌نینگ هامبورگ شهریده شکوهلی بیر احتفال اۉتکزیلیب، او یېرده، تیل بیره‌می نشانلنه‌دی.
هامبورگ احتفالیده، نطق یوریتیش بۉلیمیدن تشقری، کنسرت و شعریت چیقیشلری بۉلیب اوتیشی هم نظرده توتیلگن.
بو ییل سویس مملکتی‌نینگ زوریخ شهریده هم اېسه خاص بیر احتفال آرقه‌لی اۉزبېک تیلی ملی کونی نشانلنیشی رېجه‌لشتیریلگن.
سویس‌ده‌گی افغانستان تورکلری‌نینگ مدنی اویوشمه‌سی (ساتما) تشبثی بیلن آلینه‌یاتگن بو احتفال‌نینگ فرقلی و اۉزیگه خاص تامانی شونده که خلقی‌میزنینگ بېش کیشی تانیقلی یازووچی، پروفیسور عبدالحکیم شرعی جوزجانی، محمدحلیم یارقین، شفیقه یارقین، محمدامین متین اندخویی، بسم الله توردیقل میمنگی جنابلری قلملریگه منسوب آلتی ته ینگی اثر تقدیمات مراسمی هم اۉتکزیله‌دی.
شونینگدېک، اېرته تورکیه‌نینگ استانبول، انقره و قونیه شهرلریده هم اۉزبېک تیلی ملی کونیگه بغیشلب طنطنه‌لی و شکوهلی احتفاللر اۉتکزیلیشی معلوم قیلینگن.
